28-29 қаңтар күндері Алматы қаласында Дүниежүзілік сайлау күніне арналған іс-шаралар циклі өтті, деп хабарлайды aqshamnews.kz
Екі күн ішінде қаланың аумақтық сайлау комиссиялары семинарлар мен дәрістерден бастап, дебаттар, дөңгелек үстелдер және интерактивті алаңдарға дейінгі түрлі форматтағы 16 кездесу ұйымдастырды. Іс-шараларға барлығы 866 адам қатысты, оның 769-ы жастар.
Барлық кездесулер «Электоралды қағидаттар – сайлаушы сенімінің негізі» ұранымен өтіп, сайлау процесінің басты қағидаты – тәуелсіздікке арналды. Негізгі назар тәуелсіз сайлау комиссияларының рөліне, сайлаудың заңдылығы мен ашықтығына, сондай-ақ құқықтық мәдениет пен азаматтық жауапкершіліктің маңызына аударылды.
Мегаполистің барлық аудандарында оқыту семинарлары, қонақ дәрістер, дебаттар, пікірталастар және шығармашылық байқаулар ұйымдастырылды. Қатысушылар адал әрі ашық сайлау тақырыбын талқылап, әлеуметтік желілердің электоралды мәдениетке ықпалы туралы ой бөлісті, өз көзқарастарын және өмірлік тәжірибелерін ортаға салды. Мұндай формат сайлау туралы әңгімені жандандырып, оны түсінікті әрі шынайы қызықты етуге мүмкіндік берді.
Жұмыстың негізгі бағыты жастарға – мектеп оқушыларына, студенттерге және жас мамандарға арналды. Интерактивті тәсілдер маңызды ақпаратты жеткізіп қана қоймай, әр қатысушының өз пікірін айтуына, сұрақ қоюына және сайлауға қатысудың жеке маңызын сезінуіне жол ашты.
«Жастармен жұмыс – бұл болашақ туралы әңгіме. Біз үшін оқушылар мен студенттердің өз рөлін сезініп, олардың дауысы шынымен маңызды екенін түсінуі аса құнды», – деп атап өтті Алматы қаласы аумақтық сайлау комиссиясында.
Өткен іс-шаралар қатысушылар тарапынан үлкен қызығушылық тудырып, сайлау тақырыбының өзектілігін көрсетті. Ашық диалог пен интерактивті форматтар тәуелсіздік қағидатының мәнін тереңірек ұғынуға, сайлау жүйесіне деген сенімді нығайтуға және сайлауға қатысуға саналы көзқарас қалыптастыруға ықпал етті.