Алматы қаласында сыбайлас жемқорлыққа қарсы сана қалыптастыру жұмыстары жалғасуда.
Алматы қаласы бойынша Сыбайлас жемқорлыққа қарсы іс-қимыл агенттігі департаментінің басшысы Арман Рахимовтың айтуынша, жыл басынан бері 66 іс-шара өткізіліп, 5,5 мыңнан астам адам қамтылған, деп хабарлайды aqshamnews.kz.
«Сыбайлас жемқорлыққа қарсы мәдениетті қалыптастыру — біздегі басты басымдықтың бірі. Біз алдын алу, ағарту және азаматтық жауапкершілікке ерекше мән береміз», — деді ол өңірлік коммуникациялар қызметіндегі баспасөз конференциясында.
Мемлекеттік институтттарға деген сенімді күшейтіп, адал әрі әділ болудың маңызын арттыра түсу үшін, бұл мәселеде «Заң мен тәртіпке» көбірек арқа сүйеу маңызды.
Арман Рахимовтың айтуынша, «Сыбайлас жемқорлыққа қарсы волонтерлік» жобасы аясында Алматыда 262 ерікті жұмыс істейді. Олар 34 кездесу өткізіп, жастарды адалдыққа, заңға бағынуға үндеуде.
«Бұл жоба жастар арасында ашықтық пен әділеттілік қағидаттарын насихаттайтын тиімді алаңға айналды», — деп атап өтті ол.
Оның сөзінше, белсенді азаматтарды ынталандыруға ерекше көңіл бөлінеді. Биыл сыбайлас жемқорлық фактілері туралы хабарлаған екі адам 1,2 миллион теңге көлемінде сыйақы алған.
«Бұған бей-жай қарамай, осы іске өзінше үлес қосып жүргендерге алғысымыз шексіз. 2024 жылы барлығы 9 азамат марапатталып, олардың алтауы 5,2 миллион теңге көлемінде ақшалай сыйақы алды», — деді департамент басшысы.