Абай облысының Чекоман ауылында 12 қаңтарда күндіз жоғалып кеткен 8 жастағы бала аман-есен табылды, деп хабарлайды Aqshamnews.kz тілшісі.
Баланы іздеуге ауыл тұрғындары, полиция қызметкерлері және жергілікті атқарушы орган өкілдері жұмылдырылған. Іздеу барысында бейнебақылау камералары шешуші рөл атқарды: учаскелік инспектор ауыл әкімімен бірге жазбаларды қарап, баланың қозғалыс бағытын анықтап, оның жүрген жерін табуға көмектескен.
Полиция мәліметінше, бала бірнеше сағат бойы құдықтың ішінде болған. Ол бетон плитаның астындағы опырылған тесіктен абайсызда құлап кеткен. Баланы құдықтан дені сау күйінде шығарып алған, медициналық көмек қажет болмаған.
Баланың анасы іздеу жұмысына қатысқандардың барлығына жедел көмектері үшін алғыс білдірді. Полиция бейнебақылау жүйесі мұндай жағдайда бағытты тез анықтауға мүмкіндік беріп, баланың өмірін сақтап қалуға ықпал еткенін атап өтті.