Абай облысында әскери техниканы пайдалану кезінде қауіпсіздік талаптарының бұзылуы салдарынан келісімшарт негізінде қызмет ететін әскери қызметкер қаза тапты, деп хабарлайды Aqshamnews.kz тілшісі.
Бұл туралы ақпарат алғашында әлеуметтік желілерде тараған. Кейінірек аталған деректі Абай өңірлік гарнизонының баспасөз қызметі растады.
Ведомство мәліметінше, қайғылы оқиға 5 наурыз күні болған. Әскери техниканы пайдалану барысында қауіпсіздік талаптары бұзылып, соның салдарынан әскери қызметкер ауыр жарақат алған. Ол алған жарақатынан көз жұмған.
Қазіргі уақытта аталған факті бойынша сотқа дейінгі тергеу басталып, оқиғаның барлық мән-жайы анықталып жатыр. Оқиға орнында құзырлы органдардың өкілдері жұмыс істеуде.
Қазақстан Республикасы Қарулы Күштері Құрлық әскерлерінің қолбасшылығы мен жеке құрамы қаза тапқан әскери қызметкердің туған-туыстары мен жақындарына көңіл айтты. Сондай-ақ марқұмның отбасына заңда белгіленген тәртіпке сәйкес қажетті қолдау көрсетілетіні айтылды.
