Төтенше жағдайлар министрлігі есік алдында от жаққандарға қатысты бірнеше ескертулер жариялады. Бұл шектеулердің мамырда көкке шығып, кәуап пісірушілерге қатысы бар ма? Аqshamnews.kz тілшісі ресми жауап алды.
ТЖМ не дейді?
Ведомство берген жауапқа сенсек, саяжай және бау-бақша учаскелерінде от жағуға, қоқыстарды жағуға және өрт тудыруы мүмкін қауіпті жұмыстарды жүргізуге тыйым салу жаңа енгізілген норма емес. Өрт қауіпсіздігі ережелері 2006 жылдан бастап күшіне енген (08.02.2006 ж. 140-тармақ) және сәйкесінше осы талаптарды бұзғаны үшін белгіленетін әкімшілік жауапкершілік те бұрын бекітілген.
«Қазіргі уақытта бұл норма қолданыстағы Өрт қауіпсіздігі қағидаларының "Құрғақ, ыстық және желді ауа райы тұрақты болған жағдайда қалаларда, ауылдық елді мекендерде және кәсіпорындарда, саяжайлық ауылдарда, бау-бақша учаскелерінде от жағуға, көмір, қоқыс, қалдықтар, құрғақ шөпті жағуға, өрт қауіпті жұмыстарды жүргізуге, сондай ақ стационарлық емес сұйық, қатты және газ тәрізді отынмен жұмыс істейтін пештерді, ас-үй ошақтарын және қазандық қондырғыларын жағуға жол берілмейді" 174-тармағында жазылған» делінген жауапта.
Кәуап пен от жағуға қатысты қандай тыйым бар?
• Қолайлы ауа-райы жағдайында ғимараттар мен құрылыстардан кемінде 50 м қашықтықта, осы мақсаттар үшін арнайы бөлінген орындарда және тұрақты бақылауда от жағуға және қалдықтарды жағуға рұқсат етіледі.
• Ал мангалды (барбекюді, грильді) ғимараттар мен құрылыстардан кемінде 10 м қашықтықта пайдалануға жол беріледі, сондай-ақ орнын бір өрт сөндіргішпен немесе кемінде 10 литр суы бар сыйымдылықпен жабдықтау қажет.
• Мангалды (барбекюді, грильді) құрғақ өсімдіктері бар орындарда, ағаштардың түбінде, жанғыш материалдардан жасалған жабындардың астында орнатуға тыйым салынады.
Қанша айыппұл көзделген?
Бапқа сәйкес, өрт қауіпсіздігі талаптарын бұзғаны үшін:
• 5 АЕК-тен (19 660 теңге) – жеке тұлғаларға;
• 15 АЕК-тен (58 980 теңге) – лауазымды тұлғаларға, шағын кәсіпкерлік субъектілеріне немесе коммерциялық емес ұйымдарға;
• 25 АЕК-тен (98 300 теңге) – орта бизнес үшін;
• 50 АЕК-тен (196 600 теңге) – ірі кәсіпкерлік субъектілері үшін айыппұл салынады.