2026 жылғы 6 қаңтарда Астанадағы азаматтық істер жөніндегі ауданаралық сотта абырой, қадір-қасиет және іскерлік беделді қорғау туралы іс қаралды. Нәтижесінде сот талап-арызды қанағаттандырудан бас тартты, деп хабарлайды Аqshamnews.kz тілшісі.
Сот материалдарына сәйкес, тараптар арасында торт дайындау және тапсыру бойынша ауызша келісім болған: жауапкер салтанатты шараға арналған тортты әзірлеп, тапсырыс беруші оны алып, пайдаланған. Алайда торттың соңғы бағасы алдын ала нақты келісілмеген, осы жайт кейін даудың туындауына себеп болған.
Даудан кейін жауапкер әлеуметтік желіде жарияланым жасап, кейін үшінші тұлғалар түсірген видеоматериалдарды өз парақшасында бөліскені айтылды. Сот аталған видеоны жауапкердің өзі түсірмегенін анықтаған.
Тапсырыс беруші сот сараптамасын тағайындаудан бас тартуына байланысты, сот тараған ақпараттың абыройға нұқсан келтіретін-келтірмейтінін және оның құқықтық сипатын нақты айқындай алмаған.
Сондай-ақ сот тауар белгісі бойынша авторлық құқықтың бұзылғанын дәлелдейтін нақты дерек таппаған, жеке деректердің заңсыз жарияланғаны да расталмаған.
Осыған байланысты сот барлық талапты қанағаттандырмау туралы шешім шығарды. Қаулы әзірге заңды күшіне енген жоқ.
Айта кетейік, дау құны 600 мың теңге болатын тортқа қатысты туған.