Мемлекет басшысының тапсырмасын орындау мақсатында Сыбайлас жемқорлыққа қарсы іс-қимыл агенттігі қоғамда заңдылық пен тәртіп қағидатын қамтамасыз ету, сондай-ақ сыбайлас жемқорлық фактілерінің жолын кесу жөніндегі жұмысты жалғастыруда.
Батыс Қазақстан облысының қылмыстық істер жөніндегі мамандандырылған ауданаралық соты Алматы қаласының тұрғыны Е. Байқожаға қатысты үкім шығарды, деп хабарлайды aqshamnews.kz.
Ол «Чапаев – Жаңақала – Сайхин» автожолын күрделі жөндеу жөніндегі шарттың жалпы сомасының 30% мөлшерінде алдын ала төлем жасағаны үшін облыс әкімдігінің лауазымды адамдарына 50 млн теңге сомасында алаяқтық жасағаны және кәсіпкерді пара беруге итермелегені үшін кінәлі деп танылды.
Оған мемлекеттік қызметте және квазимемлекеттік сектор субъектілерінде лауазымға орналасуға өмір бойына тыйым сала отырып, 11 жыл мерзімге бас бостандығынан айыру түріндегі жаза тағайындалды.
Сот актісі заңды күшіне енген жоқ. Конституцияның 77-бабы 3-тармағының 1-тармақшасына және Қылмыстық-процестік кодекстің 19-бабы 1-бөлігіне сәйкес, қылмыстық құқық бұзушылық жасаудағы кінәсі соттың заңды күшіне енген үкімімен белгіленгенге дейін әрбір адам кінәсіз деп есептеледі.