Қазақстан азаматы, ірі көлемде алаяқтық жасады деген күдікпен, Польша аумағынан ұсталып, елге қайтарылды.
Бұл туралы Бас прокуратура мәлімдеді, деп хабарлайды aqshamnews.kz.
Тергеу деректеріне сүйенсек, ол 2023 жылы жәбірленушіге Польшадан екі жүк көлігін жеткізіп беремін деп уәде берген. Алайда 45 миллион теңге көлеміндегі ақшаны алған соң, міндеттемесін орындамай, қаржыны иемденіп, ізін суытқан.
Күдікті биыл ақпанда Польшадағы Бодзентын қаласында қолға түсті. Қазақстан Бас прокуратурасының сұрауымен ол елге экстрадицияланып, қазіргі таңда ұстау изоляторына қамалды.
Аталған қылмыс бойынша оның мүлкін тәркілеу және 5 жылдан 10 жылға дейін бас бостандығынан айыру жазасы қарастырылған.