Бүгін Мәжілістің жалпы отырысы өтеді. Онда депутаттар аса маңызды бірқатар заң жобасын қарауды жоспарлап отыр, деп хабарлайды Aqshamnews.kz.
Отырыста медицина қызметкерлеріне физикалық зорлық-зомбылық пен қатыгездік көрсеткені үшін жазаны қатаңдату жөніндегі Президент тапсырмасын орындауға бағытталған депутаттардың түзетулері талқыланбақ.
"ҚР Қылмыстық кодексіне және ҚР Қылмыстық-процестік кодексіне толықтырулар енгізу туралы" заң жобасы Мәжіліс қарауына 21 қарашада түскен болатын. Сол кезде жұмыс тобының жетекшісі, депутат Асхат Аймағамбетов бұл маңызды заң жобасы дәрігерлер мен медицина қызметкерлерін қорғауға арналғанын атап өткен еді.
"Медицина өкілдеріне қатысты зорлық-зомбылық үшін жазаны айтарлықтай қатаңдату жөніндегі нақты нормаларды ұсындық. Соңғы жылдары мұндай жағдайлар көбейіп барады. Бір дәрігер жұмыс орнында соққыға жығылса, тағы бірі жедел жәрдем шақырған үйде қорлық көрді. Осындай көріністерге жол беруге болмайды", - деді депутат.
Асхат Аймағамбетовтың айтуынша, бұл бастаманы дәрігерлерге жасалған шабуылдардың жиілеуі туындатқан. Соңғы бес жылда ресми статистика бойынша 280 жағдай тіркелген. Заң жобасының мақсаты тек медицина қызметкерлерін ғана емес, пациенттердің өзін де қорғауға бағытталған. Себебі қорғансыз дәрігер сапалы көмек көрсете алмайды, ал оның салдарынан ең алдымен қарапайым халық зардап шегеді.
