Қарағанды облысының полициясына 61 жастағы ауыл тұрғыны мен оның 43 жастағы ұлы арызданған, деп хабарлайды aqshamnews.kz облыстық полиция департаментінің баспасөз қызметіне сілтеме жасап.
Ұлының айтуынша, бәрі мессенджер арқылы банк қызметкерінен келген хабарламадан басталған. Одан кейін оған өзін «полиция қызметкері» деп таныстырған алаяқ қоңырау шалып, оны алдауға тырысқанын айтып, әрі қарайғы нұсқауларды орындауды ұсынған. Алаяқтар жалған құжаттар мен бейнемазмұнды пайдаланып, ер адамның сеніміне кірген.
Алаяқтар ер адамды банк қосымшаларын жүктеуге және жеті банкке несие алуға өтініш беруіне мәжбүрлеген. Бірақ өтініштердің бәрі қабылданбаған. Мұнан түк шықпаған соң алаяқтар өзі жинаған 834 мың теңгені аударуға иландырған.
Келесі күні алаяқтар әкесіне байланысқа шыққан. Оған да несиелер үшін өтініш бергізген. Сөйтіп, алынған несиінің 1 миллион 900 мың теңгесін алаяқтарға аударған. Алайда екінші 3,3 миллион теңгелік несие полиция мен банк қызметкерлерінің әрекеттерінің арқасында бұғатталды.
Нәтижесінде жалпы шығын 2,7 миллион теңгені құрады.
Қазіргі уақытта қылмыстық іс қозғалды.