Бүгін сайлау учаскесіне сағат 7:15-те келіп, ең бірінші дауыс берген «Көктем-1» ықшамауданының тұрғыны Гүлжан Утегенова болды.
aqshamnews.kz тілшісімен тілдескен Гүлжан Утегенова бұл іс-шараның маңыздылығын терең түсінемін дейді.
«Қазақстандықтар бұл референдумнан үлкен үміт күтіп отыр. Ел үшін, болашақ үшін жақсы өзгерістер болады деп сенемін. Менің де дауысымның маңызды екенін сезінген соң, ертерек келіп дауыс беріп жатырмын»,-дейді Гүлжан Утегенова.
Учаскелік сайлау комиссиясының төрағасы Медет Қасымбаевтың айтуынша, учаскеде 2332 сайлаушы бар. Олардың ең жасы әдеттегіше 18-де, ең қарт сайлаушының жасы – 84-те.
Айта кетейік, Алматыда сайлау учаскелерінде дауыс беру жергілікті уақыт бойынша сағат 07:00-ден 20:00-ге дейін жүргізіледі.