Ұлттық құрылтайдың төрт отырысында көтерілген ұсыныстардың ең өлшенетін нәтижесі – заңнамалық өзгерістер. Ұлытау, Түркістан, Атырау және Бурабайдағы жиындардан кейін қоғам сұранысы біртіндеп құқықтық нормаға айналып, барлығы 26 заң қабылданды, - деп хабарлйды aqshamnews.kz тілшісі.
Ұлытауда өткен I Құрылтайдың басты заңнамалық шешімі – 25 қазанға Республика күні ретінде ұлттық мереке мәртебесін беру болды.
Түркістандағы II Құрылтай нәтижесінде:
1. "Түркістан қаласының ерекше мәртебесі туралы" Заң;
2. "Қазақстанның Халық жазушысы" атағын қайтару;
3. "Кинематография туралы" Заңға түзетулер;
4. Ономастика жұмысын жүйелеу туралы;
5. Вейптерге, шегуге келмейтін темекі өнімдеріне тыйым салу туралы түзетулер;
6. Құмар ойын бизнесі, лотереялар және лотерея қызметі мәселелері туралы;
7. Жұмысшы мамандықтар үшін жаңадан 9 құрметті атақ енгізу;
8. Масс-медиа мәселелері туралы заңнамаға түзетулер;
9. "Онлайн-платформалар және онлайн-жарнама туралы" Заң;
10. Мемлекеттік наградаларға ұқсас қоғамдық наградаларды дайындауға және марапаттауға тыйым салатын заң;
11. Ғылым және білім беру мәселелері туралы заңнамаға түзетулер (педагогтерге қосымша төлемдер туралы) қарастырылды.
Атырауда өткен III Құрылтайдың заңнамалық нәтижелері қауіпсіздік, тәртіп және құндылықтар тақырыбын күшейтті: "Айбын" орденіне аңызға айналған қаһармандар – Сағадат Нұрмағамбетов, Бауыржан Момышұлы, Рахымжан Қошқарбаев есімдерін беру туралы түзетулер қабылданды. Қоғамдық кеңістікті қорғау үшін вандализмге қарсы күрес және табиғи нысандарды қорғау жөніндегі түзетулер енгізілді.
1. Лицензиялауды ретке келтіру және заңсыз археологиялық қазбаларға қатысты жауапкершілікті күшейту туралы түзетулер;
2. Есірткі тасымалдаушылар мен есірткі өндірушілердің жауапкершілігін саралау туралы түзетулер;
3. Әйелдердің құқықтарын қамтамасыз ету және балалар қауіпсіздігі мәселелері туралы түзетулер (тұрмыстық зорлық-зомбылыққа қатысты қылмыстық жауапкершілікке тарту, балаларға қатысты зорлықтың барлық түріне жазаны қатаңдату және т.б.);
4. Өңірлік рәміздердің бірыңғай стандарты туралы түзетулер;
5. "Мемлекеттік жастар саясаты туралы" Заңға түзетулер;
6. Креативті индустрияны қолдауға бағытталған заңнамалық шаралар пакеті.
Бурабайдағы IV Құрылтай қорытындысы қоғамдық тәртіп пен ақпараттық кеңістіктегі жауапкершілікті күшейтуге бағытталды: қоғамдық орындарда бет-бейнені тануға кедергі келтіретін киім киюге қатысты әкімшілік жауапкершілік енгізу, сондай-ақ құқыққа қайшы контентті, оның ішінде ұлтаралық және діни араздықты қоздыруға бағытталған материалдарды таратқаны үшін әкімшілік жауапкершілік енгізу бойынша шешім қабылданды. Сонымен қатар ЛГБТ мен педофилияны насихаттауға қатысты жауапкершілік енгізу бастамасы да осы пакетке кірді. Балалар құқығын қорғау бағытында әйелдердің құқықтарын қамтамасыз ету және балалар қауіпсіздігі жөніндегі түзетулердің келесі топтамасы қабылданып, қамқоршылық органдарын күшейту және балалардың құқықтарын қорғауды нығайтатын қосымша шаралар қарастырылды. Ономастика бағыты қайтадан жалғасып, ономастика саласындағы жұмысты ретке келтіру қабылданды. Ғылым мен өңірлік ынтымақтастық тұрғысынан Қазақстандағы Орталық Азия өңірлік гляциологиялық орталығының мәртебесін қайта жандандыру туралы шешім заңнамалық деңгейде бекітілді.