Продюсер Жан Мұқанов әнші Тамара Асардың жолдасы Жұмаш Бекмырзаның бірінші некесінен туған ұлы Әлішердің өліміне қатысты ақпарат берді, деп хабарлайды Аqshamnews.kz тілшісі.
Жан Мұқановтың айтуынша, 22 жастағы Әлішер Ақтөбеде досының үйлену тойына барған кезінде көлік қағып, көз жұмған.
"Әлішерді жер қойнына тапсырдық. 22 жаста еді. 8 қараша күні Қостанайда Жұмаштың ұлы Әлішердің қырық күні өтеді. Бәрі білсін – қаны бір болуы маңызды емес, ең бастысы – жүрек байланысы. Әлішер Тамара Асардың туған ұлы емес. Алайда осы жылдар ішінде туғандай болып кетті. Ол да Қамбар секілді олардың ұлы. Жұмаш пен кішкентай қыздары – Ажардың ағасы. Көп адам оның қалай қайтыс болғанын сұрап жатыр: Ақтөбеде көлік қағып кетті. Досының үйлену тойына барған еді”, – деп жазды продюсер.
Қаралы хабарды Қостанай облысы Наурызым ауданының әкімдігі де растады.
Әкімдік марқұмның отбасына көңіл айтты:
"Белгілі кәсіпкер Жұмаш Бекмырза мен жұбайы Тамара Асардың ұлы Әлішердің мезгілсіз қазасына байланысты шын жүректен көңіл айтамыз. Алла марқұмның жанын жәннаттан қылсын, жақындарына сабыр берсін", – деп жазды Наурызым ауданының әкімдігі.
Еске салайық, аза тұту рәсіміне қатысты мәлімет бойынша, қырық күндік ас 8 қарашада Қостанайда өтеді.
