Қазіргі уақытта әрбір екінші қытай азаматы артық салмақтан зардап шегеді.
Бұл жайында islam.kz порталы The Washington Post мерзімді басылымына сілтеме жасай отырып мәлім етеді, деп хабарлайды aqshamnews.kz.
Ұлттық деңгейдегі мәселеге айналған семіздік індетіне байланысты осыдан бір ай бұрын өткен Қытай комунистік партиясының құрылтайында артық салмақпен күресуді ұлттық дамудың басымдығы ретінде жарияланды. Өйткені, семіздік экономикаға қартаю процесі секілді орасан зор салмақ салады. Артық салмақтан болатын түрлі созылмалы аурулармен (жүрек-қан тамыр аурулары, сусамыр, қатерлі ісік, т.б.) күресу өз кезегінде үлкен шығынды қажет етпек. Осыны ескерген қытай басшылары дабыл қаға бастады.
Семіздік індеті бұл елде шапшаң етек алып келеді: Америка құрама штаттарының ұлттық денсаулық сақтау институты семіздікті аурулар қатарына жатқызып, ұлттық проблема ретінде таныған 1998 жылы қытай халқының тек 8%-ы ғана артық салмақтан зардап шеккен екен. Керісінше ел тұрғындарының 10%-ы ашқұрсақ өмір сүрген. Алайда, экономиканың өсуімен бірге келген бұл індеттен, дәлірегі, 27 жыл ішінде артық салмақтан бүгінде әрбір екінші қытай азаматы зардап шегеді. Егер жағдай өзгермесе, 2030 жылы, яғни, бір саусақ санына жететін бірер жылда қытай халқының 70%-ы артық салмақтан зардап шегетін болады. Осыған байланысты қытай билігі денсаулық саласына жылына 4,25 юан қаражатты қосымша бөлуіне тура келеді. Бұл сома денсаулық саласына жұмсалатын шығынның 20%-на тең көрсеткіш. Семіздік індетінің кеңінен етек алуына алаңдаған жергілікті билік пен жанашыр орындар түрлі шаралар қабылдап жатыр. Мәселен, Шенжен ғылым және технология университеті студенттер арасында ерекше байқау жариялады – бір айда бір келіден салмақ жоғалтқандарға электрлі массаж құрылғысын беруден бастап, қосымша білім несиесін ұсынып жатыр.