Beeline Kazakhstan холдингінің президенті Евгений Настрадиннің айтуынша, келесі жылы тарифтер шамамен 20 пайызға қымбаттайды, деп хабарлайды aqshamnews.kz
«Біз бағаларды жылына бір реттен жиі көтермейміз. Келер жылы бәрімізді қосылған құн салығының қымбаттауы күтіп тұр — бұл салаға 35-40 млрд теңге шамасында әсер ететін маңызды фактор. Біз бағаны қаңтар айында өзгертуді жоспарлап отырмыз. Ал биыл клиенттер үшін тарифтер өспейді. Келесі жылы шамамен 15-20% шамасында болады», — деді Настрадин Үкіметте өткен баспасөз мәслихатында.
«Мобайл Телеком-Сервис» компаниясы да жаңа жылдан бастап тарифтерді қымбаттатуды жоспарлап отыр.
«Тариф қымбаттауының басты себебі — халық тарапынан өсіп жатқан сұраныс пен оған ілесе алмай жатқан инфрақұрылым. Операторлар инфрақұрылымға көбірек инвестиция салуға мәжбүр. Өзіміздің бюджеттік жоспарлауымыз аясында экономикалық және салық өзгерістерін, инфляциялық болжамдарды ескереміз. Біз тариф жоспарларын түзету мүмкіндігін қарастырып жатырмыз. Шамамен 15-20% деңгейінде болады деп болжауға болады», — деді «Мобайл Телеком-Сервис» басқарма төрағасы Александр Бабичев.
Ал «Қазақтелеком» АҚ бас әкімшілік директоры Ержан Мейрамовтың айтуынша, ұялы байланыс қызметтерін көрсету ережелерінде операторлардың шығындары артқан жағдайда тарифтерді көтеруге болатын норма бар.
«Тариф құрамына операторлардың бірқатар шығыны кіреді, соның ішінде электр энергиясына, жабдық сатып алуға жұмсалатын шығындар бар. Егер бұл шығындар өссе, ол тарифтердің өсуіне әсер етпей қоймайды», — деді Мейрамов.