15 наурызда өтетін республикалық референдумға дайындық аясында Алматыда бекіту куәлігін алу мен пайдалану бойынша түсіндіру жұмысын жүргізіп жатыр. Қаланың аумақтық сайлау комиссиясының басшысы Айгүл Қалыкова олардың ресімделу мен қолдану жағын түсіндіріп берді, – деп хабарлайды aqshamnews.kz тілшісі.
Бекіту куәлігі кімге беріледі және оны қалай алуға болады?
Бекіту куәлігі дауыс беретін күні өзінің тіркелген жерінен тыс жерде болатын азаматтарға арналған.
Механизм қарапайым:
• Азамат алдын ала өз учаскесінен бекіту куәлігін алады,
• 15 наурызда оны нақты орналасқан учаскеде көрсетіп, сол жерде дауыс береді.
Куәлікті алуға болатын ең соңғы уақыт – 2026 жылдың 14 наурызы күнгі сағат 18:00-ге дейін. Ол үшін:
• өз учаскелік комиссиясына келіп;
• жазбаша өтініш беріп;
• жеке куәлікті көрсету керек.
Комиссия бекіту куәлігін бекітілген үлгіде рәсімдейді.
Маңызды: егер азамат «көрші учаскеде» дауыс беруді қаласа, куәлік берілмейді. Бұл механизм тек алдын ала дауыс беру күні тіркелген жерінен тыс болатыны белгілі азаматтарға арналған.
Куәлікті өкіл арқылы алуға болады ма?
Иә, заңнама бойынша бекіту куәлігін өкіл арқылы алу мүмкіндігі қарастырылған.
Бұл іссапарға шығып, денсаулығы жарамай, отбасы мүшесіне күтім керек болып немесе басқа себеппен өзі келе алмайтын азаматтарға қатысты.
Өкіл:
• сенімхат көрсетеді;
• жеке куәлікті ұсынады;
• азаматтың өтінішін тапсырады.
Өтінішке сенімхат қоса беріледі, комиссия бекіту куәлігін бекітілген тәртіппен рәсімдейді.
Көбінесе нотариалды куәландыру қажет емес, жазбаша сенімхат жеткілікті.
Айта кету керек ереже:
• Бекіту куәлігі жоғалса, қалпына келтірілмейді, дубликат берілмейді.
Бекіту куәлігімен дауыс беру қалай өтеді?
Дауыс беру күні азамат орналасқан учаскеге келіп:
• жеке куәлікті;
• бекіту куәлігін көрсетеді.
Комиссия реквизиттерді тексеріп, азаматты орналасқан жер бойынша тізімге қосады. Оның деректері соңғы жазбадан кейінгі келесі нөмірге енгізіледі. Тіркеледі:
• жеке деректер;
• жеке куәліктің реквизиттері;
• бекіту куәлігінің сериясы мен нөмірі;
• берілу күні.
Содан кейін комиссия мүшесі ресімделгенін растап, қол қояды.
Азамат бұрынғы учаскеде тіркелген жері бойынша тізімде болса, бекіту куәлігінің берілгені бөлек тіркеледі, бұл екі рет дауыс беру мүмкіндігін болдырмайды.
Осылайша, бекіту куәліктерінің жүйесі азаматтардың тіркелген жерінен тыс болған жағдайда да референдумға қатыса алатындай етеді, сонымен қатар дауыс беретін процедураның ашықтығы мен қатаң бақылауын сақтайды.
