مەملەكەت باسشىسى جامبىل وبلىسىنداعى فارماسيەۆتيكالىق كاسىپورىنداردىڭ قىزمەتىمەن تانىستى، - دەپ حابارلايدى aqshamnews.kz ءتىلشىسى.
قاسىم-جومارت توقايەۆتىڭ جامبىل وبلىسىنا جۇمىس ساپارى «ءامىر جانە د» جاۋاپكەرشىلىگى شەكتەۋلى سەرىكتەستىگىنىڭ قىزمەتىمەن تانىسۋدان باستالدى.
كاسىپورىن مەديسينالىق بۇيىمدار مەن دارىلىك زاتتار وندىرەدى.
پرەزيدەنتكە مەديسينالىق پرەپاراتتار مەن دايىن ءونىم تۇرلەرىن شىعاراتىن نەگىزگى سەحتىڭ جۇمىسى كورسەتىلدى.
«ءامىر جانە د» ءجشس-ى الەۋمەتتىك ماڭىزى بار اۋرۋلاردى دياگنوستيكالاۋعا ارنالعان جەدەل تەستىلەردىڭ كوپتەگەن ءتۇرىن شىعارادى. بۇل ونىمدەر ۆ جانە س گەپاتيتىن، ۆيچ-ينفەكسياسىن، ميوكارد تالماسىن، سونداي-اق ەسىرتكى جانە پسيحوتروپتى زاتتاردى انىقتاي الادى.
كاسىپورىنعا تيەسىلى مەديسينالىق بۇيىمداردىڭ 200-دەن اسا اتاۋلى ءتۇرى بار. بۇگىندە سەرىكتەستىكتە 94 قىزمەتكەر ەڭبەك ەتەدى.
مەملەكەت باسشىسىنا «Super-pharm» فارماسيەۆتيكالىق كومپانياسىنىڭ جۇمىسى تۋرالى اقپارات بەرىلدى.
بۇل – ەلىمىزدە مەديسينالىق بۇيىمدار وندىرەتىن جەتەكشى كاسىپورىنداردىڭ ءبىرى. زاۋىتتا 600-دەن اسا ەڭبەككەر جۇمىس ىستەيدى.
كومپانيا وتاندىق نارىقتاعى ءبىر رەتتىك قولدانۋعا ارنالعان مەديسينالىق بۇيىمدارعا سۇرانىستىڭ 30 پايىزىن قامتاماسىز ەتەدى.
اتاپ ايتقاندا، كاسىپورىن ءتۇرلى وپەراسيالار ءۇشىن حيرۋرگيالىق جانە پروسەدۋرالىق جيىنتىقتاردى، مەديسينالىق بەتپەردەنىڭ بارلىق ءتۇرىن، بىررەتتىك قورعانىش كيىمىن، سانيتارلىق-گيگيەنالىق ماقساتتاعى بۇيىمداردى وندىرەدى. سونىمەن قاتار مەديسينالىق شپريستەر، ينفۋزيوندى جانە قاندى قايتا قۇيۋعا ارنالعان سيستەما قۇرالدارى، باسقا دا ونىمدەر دايىندالادى.
پرەزيدەنت وتاندىق فارماسيەۆتيكا يندۋسترياسىنىڭ دامۋى يمپورتقا تاۋەلدىلىكتى تومەندەتىپ، ۇلتتىق دەنساۋلىق ساقتاۋ جۇيەسىن نىعايتۋدا ماڭىزدى ەكەنىن اتاپ ءوتتى.