سۋ بۇرقاقتاعى بالالاردى قۇتقارعان ستۋدەنتتى ماراپاتتادى
ادامداردى قۇتقارۋداعى باتىلدىعى ءۇشىن قازاقستان رەسپۋبليكاسى توتەنشە جاعدايلار ءمينيسترى يۋريي ءيليننىڭ بۇيرىعىمەن ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ 2-كۋرس ستۋدەنتى ابىلاي بالاپانوۆ «توتەنشە جاعدايداعى ەرلىگى ءۇشىن» توسبەلگىسىمەن ماراپاتتالدى، دەپ حابارلادى Almaty-akshamy.kz.تجم تاراتقان حاباورعا سىلتەمە جاساپ.
ماراپاتتى قازاقستان رەسپۋبليكاسىنىڭ توتەنشە جاعدايلار ءبىرىنشى ۆيسە-مينيسترى يبراگيم كۇلشىمبايەۆ تابىستادى.
«توتەنشە جاعدايلار ءمينيسترىنىڭ اتىنان سىزگە بەلسەندى ازاماتتىق ۇستانىمىڭىز ءۇشىن ريزاشىلىعىمدى بىلدىرەمىن! سىز-بۇگىنگى كۇننىڭ باتىرى اتاعىنا لايىقتىسىز. سىن ساعاتتا ەكىنىڭ ءبىرى ءسىز سياقتى ادام ءومىرىن ساقتاۋمەن قاتار، ءوز ءومىرىن قاۋىپكە تىگىپ، جەدەل شەشىم قابىلداي المايتىن ەدى»،- دەدى ءبىرىنشى ۆيسە-مينيستر.
ەسكە سالا كەتەيىك، 19 ماۋسىمدا، ابىلاي سۋ بۇرقاقتىڭ قاسىنداعى ورىندىقتا كىتاپ وقىپ وتىرعان بولاتىن. ايقاي-شۋ مەن كومەك سۇراعان داۋىستاردى ەستىگەن جاس جىگىت سۋ بۇرقاقتا توق ۇرىپ جاتقان ادامداردى كوردى. ءوز ءومىرى مەن دەنساۋلىعىنا ءقاۋىپ تونگەنىنە قاراماستان، ابىلاي ەش ويلانباستان ادامداردى قۇتقارۋعا كىرىسكەن. ونىڭ ايتۋىنشا، ەكى ادامدى قۇتقارۋ كەزىندە ءوزىن دە ەلەكتر توعى قاتتى سوققان. ستۋدەنت وز-وزىنە كەلىپ ەسىن جيعانشا، سول ماڭدا كەزدەيسوق بولعان 40-45 جاستاعى بەلگىسىز ەر ادام تاعى ءبىر قىزدى قۇتقارىپ قالعان.
سۋ بۇرقاقتا ورىن العان وقىس جاعدايدا زارداپ شەككەندەرگە رەانيماسيالىق شارالار جاساۋ ءۇشىن (جۇرەككە جاناما ماسساج جانە جاساندى تىنىس الۋ) وقيعا ورنىندا بولعان قالانىڭ جاناشىر تۇرعىندارى دا ات سالىسىپ، كومەك بەرگەن.
ابىلاي بالاپانوۆ پەن ءاتى-جونى بەلگىسىز ەر ادامنىڭ، سونداي-اق وقيعا ورنىندا بولعا قايىرىمدى جانداردىڭ باتىل ارەكەتىنىڭ ارقاسىندا ءۇش ادامنىڭ ءومىرى قۇتقارىلدى.
يبراگيم كۇلشىمبايەۆ جاس باتىرعا وتباسىلىق باقىت پەن دەنساۋلىق تىلەدى.
