قازاقستاندا 2019 جىلدان باستاپ ۇكىمەت قاۋلىسىمەن 28 ماۋسىم – بۇقارالىق اقپارات قۇرالدارى قىزمەتكەرلەرىنىڭ ءتول مەرەكەسى بولىپ بەكىتىلگەن.
ق ر اقپارات جانە قوعامدىق دامۋ ءمينيسترى ايدا بالايەۆا تىلشىلەر قاۋىمىن 28 ماۋسىم كۇنى اتاپ وتىلەتىن بۇقارالىق اقپارات قۇرالدارى قىزمەتكەرلەرىنىڭ مەرەكەسىمەن قۇتتىقتادى، دەپ حابارلايدى Almaty-akshamy.kz.
«قۇرمەتتى ارىپتەستەر، بارشاڭىزدى كاسىبي مەرەكەلەرىڭىزبەن شىن جۇرەكتەن قۇتتىقتايمىن! بۇل - تەك قانا قالام ۇستاعان جۋرناليستەردىڭ عانا ەمەس، اقپارات سالاسىندا جۇرگەن بارلىق قىزمەتكەرگە ورتاق مەيرام. بۇقارالىق اقپارات قۇرالدارى - مەملەكەت ساياساتىنىڭ ماڭىزدى باعىتتارىنىڭ ءبىرى. سەبەبى مەديا تەك رەسمي اقپارات تاراتۋدىڭ قۇرالى ەمەس، ول – ۇلتتىق قاۋىپسىزدىك پەن يدەولوگيانىڭ دا وزەگى. مەملەكەت ساياساتىن تۇسىندىرۋگە، حالىق پەن بيلىك اراسىن جالعايتىن التىن كوپىر. سوندىقتان جۋرناليستەردىڭ قوعام الدىنداعى ازاماتتىق جانە الەۋمەتتىك جاۋاپكەرشىلىكى وتە جوعارى»، - دەدى مينيستر.
سونداي-اق ۆەدومستۆو باسشىسى تاۋەلسىزدىكتىڭ 30 جىلى ىشىندە ۇلتتىق مەديا ەلىمىزبەن بىرگە جاڭارۋ مەن دامۋدىڭ بيىك بەلەستەرىنەن وتكەنىن اتاپ ءوتتى. «اقپارات سالاسىنىڭ مەملەكەتتىك باسقارۋ پروسەسىنە ىقپالى ارتىپ كەلەدى. باسپاسوزدە ساۋاتتى كوتەرىلگەن ماسەلەلەر مەملەكەت ساپاسىن كوتەرۋگە سەپتىگىن تيگىزىپ ءجۇر. پرەزيدەنتىمىزدىڭ «حالىق ۇنىنە قۇلاق اساتىن» قاعيداسىنىڭ ناتيجەلى ىسكە اسۋىندا دا جۋرناليستەردىڭ ۇلەسى زور. ءاربىر ءجۋرناليستىڭ بۇگىنگى كۇندەلىكتى ەڭبەگى ارقىلى مەملەكەتىمىزدىڭ ەرتەڭگى تاريحى جازىلىپ جاتىر. سوندىقتان اقپارات سالاسىن جاڭا دەڭگەيگە كوتەرىپ، بيىك تالعامدى قالىپتاستىرۋداعى ەڭبەكتەرىڭىز جانا بەرسىن. دەندەرىڭىزگە ساۋلىق، وتباسىلارىڭىزعا اماندىق، شىعارماشىلىق شالقار شابىت پەن تولايىم تابىس تىلەيمىن!» - دەدى ايدا بالايەۆا.