جۇڭگو حالىق رەسپۋبليكاسىنا ەكى اپتالىق كۋرستارعا قازاقستاننان 30 مامان اتتاندى. بۇعان دەيىن كورشى ەلدەن 30 ادامنان قۇرالعان العاشقى توپ ورالعان بولاتىن.
بيىل قىتايدا بىلىكتىلىكتى ارتتىرۋ كۋرستارىنان قازاقستاندىق سۋ سالاسىنىڭ 120 مامانى وتەدى. وقىتۋ كۋرستارى جۇڭگو تاراپىنىڭ قاراجاتى ەسەبىنەن ۇيىمداستىرىلعاندىقتان، ءىس-شارانى ۇيىمداستىرۋعا قازاقستان رەسپۋبليكاسىنىڭ مەملەكەتتىك بيۋدجەتىنەن قاراجات بولىنگەن جوق.
بيىلعى ناۋرىز ايىندا ق ر سۋ رەسۋرستارى جانە يرريگاسيا مينيسترلىگى مەن قحر سۋ شارۋاشىلىعى مينيسترلىگى العاش رەت ءوزارا تۇسىنىستىك پەن ىنتىماقتاستىق تۋرالى مەموراندۋمعا قول قويعانىن ەسكە سالا كەتەيىك.
قۇجات سۋ رەسۋرستارىن ۇتىمدى جانە تۇراقتى پايدالانۋ، زاماناۋي تەحنولوگيالاردى ەنگىزۋ، بالامالى سۋ كوزدەرىن ءبولۋ مەن يگەرۋ باعىتتارى بويىنشا ەكىجاقتى ىنتىماقتاستىقتى نىعايتۋدى، سونداي-اق تاجىريبە الماسۋدى جانە مامانداردى بىرلەسىپ دايارلاۋدى كوزدەيدى.
«قازاقستاندىق ماماندار قىتايدان باسقا، اقش، فرانسيا جانە جاپونيادا دا وقۋدان ءوتتى. قازىرگى ۋاقىتتا باسقا دا مەملەكەتتەرمەن كەلىسسوزدەر جۇرگىزىلىپ جاتىر. بىلتىرعىداي، بيىل دا قازاقستانداعى ارنايى ورتالىقتاردا وقۋ كۋرستارى وتەدى. 2025 جىلى بۇل كۋرستاردان شامامەن 1000 مامان وتەدى دەپ جوسپارلانىپ وتىر. بۇل بىلتىرعىمەن سالىستىرعاندا ەكى ەسە كوپ»،
— دەدى سۋ رەسۋرستارى جانە يرريگاسيا ۆيسە-مينيسترى نۇرلان الدامجاروۆ.