كاسىبي بىلىكتىلىك ۇستاحاناسى

الماتى كولىك جانە كوممۋنيكاسيالار كوللەدجىنە –   95 جىل

الماتى كولىك جانە كوممۋنيكاسيالار كوللەدجى سوناۋ تۇركسىب تەمىرجولى سالىنعان جىلداردان بەرى ەلىمىز ءۇشىن مىڭداعان تەمىرجول ماماندارىن دايارلاپ كەلە جاتقان قارا شاڭىراق، بۇگىندە ساپالى ءبىلىم مەن سۇرانىسقا يە كادرلاردىڭ ورداسى. 

اتاۋلى داتاعا وراي كوللەدجدە ەرەكشە مەرەيتويلىق ءىس-شارا ۇيىمداستىرىلىپ، جاڭا «كولىك، كوممۋنيكاسيالار جانە لوگيستيكا» وڭىرلىك قۇزىرەتتىلىكتەر ورتالىعى  مەن وقۋ ورنىنىڭ تاريحىنان سىر شەرتەتىن مۇراجايدىڭ تۇساۋى كەسىلدى. سالتاناتتى جيىن الماتى قالاسى اكىمدىگى مەن الماتى قالاسى ءبىلىم باسقارماسىنىڭ قولداۋىمەن ءوتتى. جيىنعا «اتامەكەن» كاسىپكەرلەر پالاتاسى، الەۋمەتتىك سەرىكتەستەر مەن قالامىزداعى وزگە دە مەملەكەتتىك كوللەدجدەردىڭ ديرەكتورلارى جانە ب ا ق وكىلدەرى قاتىستى.

ماقسات – باسەكەگە قابىلەتتى مامان دايىنداۋ

مەرەكەلىك جيىندا كوللەدج ديرەكتورى ەربول جاروللا ۇلى ماعازوۆ قۇتتىقتاۋ ءسوز سويلەپ، جاڭا ورتالىقتىڭ ماڭىزدىلىعىن اتاپ ءوتتى:

– كوللەدجىمىزدىڭ 95 جىلدىق مەرەيتويى اياسىندا قۇزىرەتتىلىك ورتالىعىنىڭ اشىلۋى – ءبىز ءۇشىن ۇلكەن جەتىستىك. بۇل ورتالىق تەك ستۋدەنتتەرگە عانا ەمەس، وقىتۋشىلار مەن سالا ماماندارىنا دا كاسىبي ءبىلىمىن شىڭداۋعا جول اشادى. زاماناۋي وقۋ جابدىقتارىمەن جابدىقتالعان اتالمىش ورتالىقتا قايتا دايارلاۋ، بىلىكتىلىكتى ارتتىرۋ جانە قىسقا مەرزىمدى كۋرستار وتكىزۋ جوسپارلانعان. باستى ماقساتىمىز – ەڭبەك نارىعىنىڭ سۇرانىسىنا ساي، باسەكەگە قابىلەتتى مامانداردى دايىنداۋ، – دەدى كوللەدج ديرەكتورى ەربول جاروللا ۇلى.

2021-2022 وقۋ جىلىندا «جاس مامان» جوباسى اياسىندا قۇنى 185 ميلليون تەڭگە تۇراتىن زاماناۋي وقۋ قۇرال-جابدىقتارى – ونىڭ ىشىندە تە33ا تەپلوۆوزىنىڭ ترەناجەر كابينەتى ورناتىلىپ، وقۋ ۇدەرىسىنە ەنگىزىلدى. بۇل – كوللەدجدىڭ تەحنيكالىق بازاسىنىڭ زاماناۋي تالاپتارعا ساي ەكەنىن كورسەتەدى. 

تاريحتان تابارىك 

كوللەدجدىڭ باي تاريحى مەن بولاشاققا جول سىلتەيتىن مۇراسىن ساقتاۋ ماقساتىندا ارنايى مۇراجاي اشىلدى. مۇندا وقۋ ورنىنىڭ وتكەنى مەن جەتىستىكتەرى، ەلگە قىزمەت ەتكەن تۇلەكتەرى جايلى قۇندى دەرەكتەر مەن جادىگەرلەر جيناقتالعان. بۇل – بولاشاق ماماندار ءۇشىن شابىت، تاريح ءۇشىن – قۇندى قازىنا.

كوللەدجدىڭ 2014 جىلعى تۇلەگى، قازىرگى تاڭدا جىلجىمالى قۇرام ءبولىمىنىڭ مەڭگەرۋشىسى نۇرگۇل دارحان قىزى جاڭا مۇراجايدى قوناقتارعا ەرەكشە ىقىلاسپەن تانىستىرىپ، ءاربىر جادىگەردىڭ تاريحىن اسەرلى جەتكىزدى: «ءبىلىم ورداسى جەتى ماماندىق بويىنشا بىلىكتى ماماندار دايارلايدى. 95 جىل ىشىندە وقۋ ورداسىن 80 مىڭنان استام تۇلەك ءتامامدادى. ولار ەلىمىزدىڭ تۇكپىر-تۇكپىرىندە ەڭبەك ەتىپ، قازاقستان ەكونوميكاسىنىڭ دامۋىنا سۇبەلى ۇلەس قوسىپ كەلەدى. بۇل مۇراجاي – تەك وتكەننىڭ ەستەلىگى ەمەس، بولاشاققا جول سىلتەيتىن تاعىلىمدى تاريح».

ساڭلاقتار تۇلەپ ۇشقان وردا

الماتى كولىك جانە كوممۋنيكاسيالار كوللەدجى وسى كۇنگە دەيىن 60 مىڭنان استام بىلىكتى مامان دايارلاعان. تۇلەكتەرىنىڭ اراسىندا ەلىمىزگە بەلگىلى باسشىلار، سالا ارداگەرلەرى مەن ۇزدىك ينجەنەرلەر بار. سونىڭ ىشىندە – اسەت مۇحانبەتوۆ، ايدىن ساتىبالدين، سەرىك يبراگيموۆ، اسەم شىنىبايەۆا، باعداۋلەت ابىزبايەۆ سىندى ماماندار بۇگىندە تەمىرجول جانە ءبىلىم سالاسىنداعى ءتۇرلى قۇرىلىمداردا باسشىلىق قىزمەت اتقارۋدا.

كوللەدج دۋالدى وقىتۋ جۇيەسىن، كاسىپتىك تاجىريبە مەن ءبىلىمدى ۇشتاستىرۋعا باسىمدىق بەرەدى. زاماناۋي تالاپتارعا ساي وقىتۋشىلار قۇرامى مەن وندىرىستىك شەبەرلەر بىرلەسە وتىرىپ، بولاشاق مامانداردى تەك بىلىممەن عانا ەمەس، ومىرلىك داعدىلارمەن دە قارۋلاندىرىپ وتىر.

الماتى كولىك جانە كوممۋنيكاسيالار كوللەدجى – وتكەننىڭ ونەگەسىن ۇلىقتاپ، بولاشاققا نىق قادام باسقان ءبىلىم ورداسى. 95 جىلدىق تاريح – تەك ساندار عانا ەمەس، وندا مىڭداعان تاعدىر، ەڭبەك پەن جەتىستىك جاتىر. جاڭا ورتالىقتار مەن باستامالار ارقىلى كوللەدج الداعى عاسىردى دا سەنىممەن قارسى الاتىنىنا كۇمان جوق.

سالتاناتتى جيىندا كوللەدج ستۋدەنتتەرى كونسەرتتىك باعدارلاما ازىرلەدى. جاس ونەرپازدار ءان شىرقاپ، بي بيلەپ، كوللەدجدىڭ گيمنىن زور ماقتانىشپەن ورىندادى. كەش قوناقتارى كوللەدج ۇجىمىنا العىس حاتتار تابىستاپ، ەستەلىك سىيلىقتار مەن گۇل شوقتارىن ۇسىندى.

·        تاقىرىپقا وراي

 مۇحيت سماعۇلوۆ، وندىرىستىك وقىتۋ شەبەرى:

 زاماناۋي باسقارۋ قۇرىلعىلارى قولدانىلادى

بىزدە تەمىرجول ۋچاسكەسىنىڭ ناقتى ماكەتى جاسالعان. بۇل جەردە ستۋدەنتتەر پويىز قابىلداۋ، جونەلتۋ، باعدارشامدار مەن باعىتتامالاردى باسقارۋ سياقتى جۇمىستاردى تولىقتاي ورىندايدى. اۆتوبۇعاتتاۋ، ميكروپروسەسسورلىق جۇيەلەر سەكىلدى زاماناۋي باسقارۋ قۇرىلعىلارى قولدانىلادى. مۇنداي تولىققاندى ماكەت قازاقستاندا تەك ءبىزدىڭ كوللەدجدە عانا بار.

لەونيد بويكو، ارنايى پاندەر وقىتۋشىسى:

 ارنايى ترەناجەر سالانى تولىق مەڭگەرۋگە مۇمكىندىك بەرەدى

مەن – تەمىرجولشى وتباسىنان شىققان كوللەدج تۇلەگىمىن. قازىرگى زامانعى ەلەكتروۆوزدار 25 مىڭ ۆولتتىق كەرنەۋمەن جۇمىس ىستەيدى. كوللەدجدەگى ترەناجەر ستۋدەنتتەرگە پويىزدى جۇرگىزۋ، تەجەۋ جانە قاۋىپسىزدىك شارالارىن تولىق مەڭگەرۋگە مۇمكىندىك بەرەدى. وقۋ كەزىندە العاشقى مەديسينالىق كومەك كورسەتۋ داعدىلارى دا ۇيرەتىلەدى.

نۇرلان يبرايىم، ا-3-1 توبىنىڭ 3-كۋرس ستۋدەنتى:

 ساپالى ءبىلىم مەن وندىرىستىك تاجىريبە ۇيلەسكەن

مەن WorldSkills جارىسىندا «اۆتوماتشى» جانە «ستۆ قۇرىلعىلارىن جوندەۋ جانە مونتاجداۋ» باعىتى بويىنشا ءبىرىنشى ورىن يەلەندىم. البەتتە، بۇل – كوللەدجدە العان ساپالى ءبىلىم مەن وندىرىستىك تاجىريبەنىڭ ناتيجەسى. نەگە دەسەڭىز، مۇندا كاسىبي بىلىكتى ۇستازداردان ۇيرەنىپ، زاماناۋي جابدىقتارمەن جۇمىس ىستەۋ مۇمكىندىگى بار. ءوز ماماندىعىمدى قيىن بولسا دا قىزىق، بولاشاعى بار سالا دەپ سانايمىن. بارلىق جاعداي جاسالعان بۇل وقۋ ورنى – شىن مانىندە بىلىكتى مامان بولۋعا جول اشاتىن كەرەمەت مۇمكىندىك دەپ ەسەپتەيمىن. 

ارتەم ەمەليانوۆ، ت-3-1 توبىنىڭ 3-كۋرس ستۋدەنتى:

ديناميكالىق پلاتفورما قوزعالىستى تولىقتاي قايتالايدى

ءبىزدىڭ كوللەدجدەگى تەپلوۆوز كابيناسىنىڭ ترەناجەرى – ناعىز لوكوموتيۆتىڭ ءدال كوشىرمەسى. مۇندا ماشينيست پەن ونىڭ كومەكشىسىنە ارنالعان ورىندار، باسقارۋ تەتىكتەرى – بارلىعى شىنايى. بۇل ترەناجەر ديناميكالىق پلاتفورمادا ورنالاسقان، ياعني قوزعالىستى تولىقتاي قايتالايدى. قازاقستاندا مۇنداي ترەناجەر تەك ەكەۋ – بىرەۋى استانادا، ەكىنشىسى ءبىزدىڭ كوللەدجدە. بۇل – ۇلكەن مۇمكىندىك.