سوڭعى جىلدارى اۋە كولىگى جولاۋشىلار ءۇشىن ىڭعايلى ءارى تارتىمدى بولۋدا.
مىسالى، قازاقستاندا جىل سايىن اۋە تاسىمالى 10–15%-عا ارتۋدا. 2024 جىلى قازاقستاندىق اۆياكومپانيالار 15 ملن-عا جۋىق ادامدى تاسىمالدادى، اۋەجايلار 30 ميلليون جولاۋشىعا، ونىڭ ىشىندە شەتەلدىك اۆياكومپانيالار مەن ازاماتتارعا قىزمەت كورسەتتى.
2024 جىلى جۇك تاسىمالى كولەمى – جىلىنا 28 مىڭ تونناعا ۇلعايدى. وتاندىق اۋە تاسىمالداۋ جۇيەسىن دامىتۋداعى ماڭىزدى ەلەمەنت ۇشاقتار پاركىن جاڭارتۋ. ول جىل سايىن 10–15 اۋە كەمەسىمەن تولىقتىرىلادى. بۇگىنگى تاڭدا قازاقستاننىڭ اۆياپاركى 102 ۇشاقتى قۇرايدى. وتكەن جىلى ءىرى تۇيىندىك حابتاردى دامىتۋ ماقساتىندا اۋە كولىگى ينفراقۇرىلىمىن جاڭعىرتۋ اياسىندا ءۇش جاڭا جولاۋشىلار تەرمينالى پايدالانۋعا بەرىلگەنى بەلگىلى. ماسەلەن، الماتى، شىمكەنت جانە قىزىلوردا قالالارىندا جولاۋشىلار تەرمينالىنىڭ وتكىزۋ مۇمكىندىگى ۇلعايدى. شىمكەنت قالاسى اۋەجايىنىڭ جاڭا تەرمينالىنىڭ وتكىزۋ مۇمكىندىگى جىلىنا 800 مىڭنان 6 ملن جولاۋشىعا دەيىن ۇلعايدى. جاڭا تەرمينال حالىقارالىق اۋە باعىتتارىنىڭ سانىن 10-عا، رەيستەردى اپتاسىنا 24-كە دەيىن ارتتىردى.