مەملەكەت باسشىسى جاريالاعان جۇمىسشى ماماندىقتار جىلىندا قاراپايىم ەڭبەك ادامدارىن باعالاۋ مەن دارىپتەۋ – ەل دامۋىنىڭ ماڭىزدى باعىتىنا اينالدى. ويتكەنى كاسىبىنە ادال، ىسىنە تياناقتى ماماندار – ناعىز ەل تىرەگى. سولاردىڭ ءبىرى – بۋلدوزەر ءماشينيسى بولات جولتاي ۇلى كەنجەمۇحانوۆ.
ول ءوندىرىس سالاسىندا 34 جىلدان استام ەڭبەك ەتىپ كەلەدى. كوپ جىلعى تاجىريبەسى مەن كاسىبي شەبەرلىگى ارقاسىندا بولات جولتاي ۇلى بۇگىنگى تاڭدا ۇجىمىنا دا، قوعامعا دا ۇلگى بولىپ وتىر. ءوزىنىڭ ەڭبەك جولىن «قوستاناي مينەرالدارى» اكسيونەرلىك قوعامىندا باستاپ، جيىرما جىلعا جۋىق سول كاسىپورىندا تەر توكتى، ال سوڭعى جىلدارى «كوماروۆ تاۋ-كەن كاسىپورنى» جشس-دە قىزمەتىن جالعاستىرۋدا.
بولات جولتاي ۇلى – تەك مىقتى مامان عانا ەمەس، سونداي-اق جاستاردىڭ ناعىز تالىمگەرى. جاڭا كەلگەن جۇمىسشىلارعا باعىت-باعدار بەرىپ، ءوز ءبىلىمىن اياماي بولىسەتىن تاجىريبەلى مامان. ول بۋلدوزەر تەحنيكاسىنىڭ قىر-سىرىن جەتىك مەڭگەرىپ، قاۋىپسىزدىك تالاپتارىن ءاردايىم ءبىرىنشى ورىنعا قويادى.
ارىپتەستەرى ونى قاراپايىمدىلىعى مەن ادالدىعى ءۇشىن، ال باسشىلىق جوعارى كاسىبيلىگى ءۇشىن قۇرمەتتەيدى. جۇمىستاعى ۇقىپتىلىق، تارتىپكە دەگەن جاۋاپكەرشىلىك – ونىڭ باستى قاعيدالارى.
بولات جولتاي ۇلىنىڭ كوپ جىلعى قاجىرلى ەڭبەگى لايىقتى باعالاندى. ول 2022 جىلى «كەنشى داڭقى» III دارەجەلى توسبەلگىسىمەن ماراپاتتالدى. بۇل – تەك ءبىر ادامنىڭ ەمەس، تۇتاس ءبىر ۇرپاقتىڭ ەڭبەگىنە بەرىلگەن باعا. بۇل ماراپات كەن ءوندىرۋ سالاسىندا كوپ جىل بويى ابىرويلى قىزمەت ەتىپ جۇرگەن، ەل يگىلىگى جولىندا ايانباي ەڭبەك ەتكەن ازاماتتارعا بەرىلەدى. ب.جولتاي ۇلى بۇل قۇرمەتكە ىسىمەن دە، ومىرلىك ۇستانىمىمەن دە ابدەن لايىق.
بولات ءۇشىن باستى قۇندىلىق – وتباسى. جۇبايىمەن بىرگە ەكى بالا تاربيەلەپ، ولارعا ەڭبەككە دەگەن سۇيىسپەنشىلىكتى، ادامدارعا دەگەن قۇرمەتتى جانە تۋعان ەلگە ادال بولۋدى ۇيرەتتى. بۇل – كوپ جىلدىق ەڭبەك جولىمەن قاتار جۇرەتىن ادامدىق ونەگە.
بۇگىندە ۇرپاعىنا ونەگە بولا بىلگەن ەڭبەك ادامى – قوعام ءۇشىن دە، ۇرپاق ءۇشىن دە باعا جەتپەس تۇلعا.