پرەمەر-مينيستر ولجاس بەكتەنوۆ ءتوراعالىق ەتەتىن سيفرلىق شتاب eGov/Aitu جانە Alem.cloud بويىنشا مينيسترلىكتەرگە تاپسىرمالار جۇكتەدى، - دەپ حابارلايدى aqshamnews.kz ءتىلشىسى.
مەملەكەتتىك ورگاندارعا كەلەسى تاپسىرمالار بەرىلدى:
- قارجى، ۇلتتىق ەكونوميكا، جاساندى ينتەللەكت جانە سيفرلىق دامۋ مينيسترلىكتەرى جەرگىلىكتى اتقارۋشى ورگاندارمەن بىرلەسىپ، "Astana Hub حالىقارالىق IT-ستارتاپتار تەحنوپاركى" كورپوراتيۆتىك قورىن وڭىرلىك يننوۆاسيالار جانە كاسىپكەرلىك ورتالىعى رەتىندە نىعايتۋ ءۇشىن 2025 جىلعى 10 قاراشاعا دەيىن اقپاراتتىق-كوممۋنيكاسيالىق تەحنولوگيالار سالاسىنداعى باسىم قىزمەت تۇرلەرىنىڭ تىزبەسىن كەڭەيتسىن.
- ازاماتتار ءۇشىن قولايلى ءارى ءقاۋىپسىز سيفرلىق ورتا قالىپتاستىرۋ ماقساتىندا مەملەكەتتىك ورگاندار مەن ولارعا ۆەدومستۆولىق باعىنىستى ۇيىمدار جەكە ءموبيلدى قوسىمشالاردى ازىرلەۋگە تىيىم سالۋى جانە ولاردىڭ تەك eGov جانە Aitu پلاتفورمالارىندا جۇزەگە اسىرىلۋىن قامتاماسىز ەتۋى ءتيىس.
- Alem.cloud ۇلتتىق سۋپەركومپيۋتەر ورتالىعىندا ەسەپتەۋ رەسۋرستارىن ءبولۋ قاعيدالارى بەكىتىلسىن، سودان كەيىن ءتيىستى نورماتيۆتىك قۇقىقتىق اكت ازىرلەنسىن. عىلىم جانە جوعارى ءبىلىم مينيسترلىگى قولدانىستاعى تەتىكتەر شەڭبەرىندە جوو-لارعا قولداۋ كورسەتۋدى قامتاماسىز ەتسىن.
سيفرلىق شتابتىڭ شەشىمىمەن مەملەكەتتىك ورگاندارعا Astana Hub IT-ستارتاپتار تەحنوپاركى قىزمەتىنىڭ باسىم تۇرلەرىنىڭ تىزبەسىنە مۋلتيمەديا، ويىنداردىڭ ديزاينىن جاساۋ مەن باسىپ شىعارۋ، باعدارلامالىق قامتاماسىز ەتۋدى ەنگىزۋ، سۇيەمەلدەۋ جانە تۇرلەندىرۋ، كيبەرسپورت سالاسىنداعى قىزمەتتەر سياقتى تانىمال باعىتتاردى قوسۋ تاپسىرىلدى. بۇدان باسقا، اتالعان تىزبە ق ر رەزيدەنتى ەمەستەرگە باعدارلامالىق قامتۋدى پايدالانا وتىرىپ، بيزنەس-پروسەستەر اۋتسورسينگى، اعىلشىن ءتىلىن وقىتۋ سياقتى قىزمەتتەرمەن تولىقتىرىلدى. قىزمەتتەر اياسىن كەڭەيتۋ Astana Hub-تىڭ جاھاندىق تەحنولوگيالىق قوعامداستىقتى تارتۋ ورتالىعى رەتىندەگى ۇستانىمىن كۇشەيتە تۇسەدى.
ىڭعايلى جانە ءقاۋىپسىز سيفرلىق ورتانى قالىپتاستىرۋ ماقساتىندا بارلىق مەملەكەتتىك ءموبيلدى سەرۆيستەر SuperApp قاعيداتى بويىنشا eGov جانە Aitu ەكوجۇيەلەرىنە كەزەڭ-كەزەڭىمەن بىرىكتىرىلەتىن بولادى. ينتەگراسيا ءموبيلدى قوسىمشالاردىڭ بىتىراڭقىلىق ماسەلەسىن جويادى، ۇدەرىستەردى جەدەلدەتەدى جانە حالىققا مەملەكەتتىك قىزمەتتەر كورسەتۋ ساپاسىن ارتتىرادى.
Alem.cloud سۋپەركومپيۋتەرلىك ورتالىعىنىڭ ەسەپتەۋ رەسۋرستارىن ءبولۋ ەرەجەلەرىن بەكىتۋ Astana Hub ستارتاپتارى، عىلىمي ۇيىمدار مەن ۋنيۆەرسيتەتتەر، مەملەكەتتىك ورگاندار جانە ولاردىڭ ۆەدومستۆولىق باعىنىستى ۇيىمدارى، سونداي-اق شەتەلدىك كومپانيالاردى قوسا العاندا، جەكە سەكتور جوبالارى ءۇشىن جوعارى ءونىمدى قۋاتتارعا قول جەتكىزۋدىڭ ناقتى ءارى ايقىن تەتىگىن قالىپتاستىرادى.
Alem.cloud قۋاتىن پايدالانۋعا بەرۋدىڭ باسىم باعىتتارى جاساندى ينتەللەكتتىڭ ۇلتتىق دامۋ مىندەتتەرىن ەسكەرە وتىرىپ انىقتالادى جانە ءبىلىم بەرۋ، دەنساۋلىق ساقتاۋ، اۋىل شارۋاشىلىعى، سۋمەن جابدىقتاۋ، مەملەكەتتىك باسقارۋ، مۇناي-گاز سالاسى، تاۋ-كەن مەتاللۋرگيا كەشەنى، ەنەرگەتيكا، گەولوگيالىق بارلاۋ، كولىك جانە لوگيستيكا، ونەركاسىپ، قۇرىلىس، روبوتوتەحنيكا جانە تاعى دا باسقا سالالاردى قامتيدى.