كەيىنگى جىلدارى قوعامدا بالامەن ۇيدە وتىراتىن انالار عانا ەمەس، دەكرەتتىك دەمالىسقا شىعاتىن اكەلەر دە كوبەيىپ كەلەدى. ءتىپتى تانىمال ەر-ازاماتتاردىڭ ءوزى وتباسىن ءبىرىنشى ورىنعا قويىپ، ۋاقىتشا مانسابىن شەگەرۋگە دايىن ەكەنىن كورسەتىپ ءجۇر. اqshamnews.kz ءتىلشىسى اكەلەر كۇنىنە وراي دەكرەتكە شىققان تانىمال اكەلەردى ءتىزدى.
كاسىپكەر تۇرسىن الاگوزوۆ قىزدارى ءۇشىن دەكرەتتى تاڭدادى
الاگوزوۆتار وتباسى ءۇشىن بىلتىر قۋانىشقا تولى جىل بولدى. تامىزدا قاتارىنان ەكى مارتە اتا-انا اتانعان ولار بالا كۇتىمىنە ەرەكشە ءمان بەرگەن. الما جانە الينا ەسىمدى قىزداردىڭ اكەسى - تۇرسىن الاگوزوۆ قىزدارى ءۇشىن دەكرەتتىك دەمالىسقا شىققان. ءتىپتى باسىندا ۇيدەن شىقپاي، قىزدارىنىڭ جاعدايىنا قاتتى قاراعان. بۇل تۋرالى كاسىپكەردىڭ جارى بايان ماقسات قىزى سۇحباتتارىنىڭ بىرىندە ايتقان ەدى.
“بالا تۋىپ، ۇيدە وتىراتىن ايەلدەردى تۇسىنبەيمىن. ولار ۇنەمى شارشاپ جۇرەدى. بالا مەن كۇيەۋدىڭ جاعدايى نەمەسە ءۇيدىڭ تىرلىگىنەن قولدارى بوسامايدى. مەنىڭ بالالارىم ەشقاشاندا مازامدى العان ەمەس. تۇنىمەن ۇيىقتاماي، بولماسا جىلاپ، مازالاعان ەمەس. ەكى قىزىمدى تۋعاندا دا دەكرەتتە وتىرعان ەمەسپىن. ءقازىر تۇرسەن دەكرەت دەمالىسىندا وتىر. ول ءتىپتى ۇيدەن شىقپايدى. العاشقى 15 كۇن مۇلدەم ۇيدەن شىقپاي قويدى. ال مەن ەكىنشى كۇنى كينوعا ءتۇسىپ كەتتىم. مەنىڭ امالىم بولمادى. ول ۇنەمى قورعان بولعىسى كەلەدى. بارلىق اكەلىك قاسيەتتەرىن كورسەتىپ جاتىر. بىرەسە اڭگىمە ايتادى، بىرەسە ازىلدەپ قويادى. "ولار مەنىڭ اكەسى ەكەنىمدى ءبىلۋى كەرەك، ءيىسىمدى، داۋىسىمدى تانۋى كەرەك" دەگەن ۋايىممەن جۇرەدى"، – دەپ اعىنان جارىلدى پروديۋسەر.
سۋرەت: inst/bayanmaxatkyzy
"بالام ءۇشىن جۇمىستان باس تارتتىم" - Alem
Ninety One توبىنىڭ ءسوليسى Alem دە اكە اتانىپ، دەكرەتتىك دەمالىسقا شىققان جۇلدىزداردىڭ قاتارىندا. ول بۇل شەشىمگە قالاي كەلگەنىن سۇحباتتارىنىڭ بىرىندە ايتقان ەدى.
"مەن ءقازىر جۇمىس ىستەپ جۇرگەن جوقپىن. بالام ءۇشىن جۇمىستان باس تارتىپ، دەكرەتتى تاڭدادىم. بالا باعۋ وڭاي نارسە ەمەس. الەمدەگى ەڭ قيىن جۇمىستاردىڭ ءبىرى. پسيحوەموسيونالدىق تۇرعىدان دا، فيزيكالىق تۇرعىدان دا كوپ ەنەرگيانى قاجەت ەتەدى. مەن ستۋدياعا بارىپ، جۇمىسىمدى جالعاستىرىپ، ۇيگە كەش كەلىپ، بالا تاربيەسىنە ارالاسپاي جۇرسەم دە بولار ەدى. ءبىراق بۇل ءبىر ايەل ادام ءۇشىن وتە اۋىر نارسە"، - دەدى Alem.
سۋرەت: inst/xcialem
"6 ايعا دەكرەتكە شىقتىم" - Zaq
بىلتىر ايگىلى Ninety One توبىنىڭ تاعى ءبىر مەمبەرى Zaq لاقاپاتىمەن بەلگىلى دۋلات مۇحامەتقالي دە اكە اتاندى. ايرين ەسىمدى قىزدىڭ اكەسى دە وتباسى ءۇشىن دەكرەتتىك دەمالىستى تاڭداعان. بۇل تۋرالى ول ءوزىنىڭ الەۋمەتتىك جەلىدەگى پاراقشاسىندا بولىسكەن بولاتىن.
"مەن 6 ايعا دەكرەتكە شىعىپ، وتباسىممەن بىرگە بولۋدى تاڭدادىم. ۇيدە وتىرعان كەزدە الەۋمەتتىك جەلىلەر مەن جاڭالىقتاردى ءجيى قاراي باستادىم. الەمنەن قالىپ قويمايىن دەپ ويلادىم. ءبىراق جەلىدە تەك نەگاتيۆ، جانجالدار مەن ماقتانشاقتىق كوبەيىپ كەتكەنىن بايقادىم. بۇل مەنى ۋايىمعا سالىپ، ءتۇرلى قورقىنىشتار تۋعىزا باستادى. كۇندىز قىزىممەن بىرگە ويناپ، كۇلىپ جۇرسەم دە، تۇندە ايەلىم مەن قىزىم ۇيىقتاپ جاتقاندا، مەن لەنتانى شەكسىز اتقارا بەرەتىنمىن. سول كەزدە ىشىمدە كۇيزەلىس جينالا بەردى. بۇرىن مەن بۇنى دەمالىس دەپ ويلايتىنمىن، ال شىن مانىندە، ءوزىمدى ودان سايىن شارشاتتىم. ءقازىر ءتۇسىندىم، دەمالىس تازا، جانعا جايلى بولۋى كەرەك جانە مۇمكىندىگىنشە تەلەفونسىز بولعانى جاقسى”، – دەدى ءانشى.
سۋرەت: inst/zaqcount
ەسكە سالايىق، 2025 جىلدىڭ العاشقى 4 ايىندا ەلىمىزدە 863 اكە رەسمي تۇردە دەكرەتتىك جاردەماقى العان. بىلتىر - 477، ال 2023 جىلى 583 اكە بالا كۇتىمىنە بايلانىستى الەۋمەتتىك دەمالىسقا شىققان.