الماتىنىڭ جەتىسۋ اۋدانىندا "قۇلاگەر" مەديسينالىق-سانيتارلىق العاشقى كومەك كورسەتۋ ورتالىعىنىڭ جاڭا فيليالى سالتاناتتى تۇردە اشىلدى.
زاماناۋي مەديسينالىق نىساننىڭ پايدالانۋعا بەرىلۋى قالانىڭ دەنساۋلىق ساقتاۋ جۇيەسىن دامىتۋداعى ماڭىزدى قادام ءارى تۇرعىندارعا مەديسينالىق كومەكتىڭ قولجەتىمدىلىگى مەن ساپاسىن ارتتىرۋعا باعىتتالعان.
مەديسينالىق-سانيتارلىق العاشقى كومەكتى تولىقتاي كورسەتەتىن فيليال اۋدان تۇرعىندارىنىڭ قاجەتتىلىگىن ەسكەرە وتىرىپ سالىنعان.
مۇندا جالپى تاجىريبە دارىگەرلەرى مەن بەيىندى ماماندار قابىلدايدى، پروفيلاكتيكالىق تەكسەرۋ مەن ۆاكسيناسيا جاسالادى، جۇكتى ايەلدەر مەن بالالار باقىلاۋعا الىنادى، سوزىلمالى اۋرۋلارى بار ناۋقاستارعا ديناميكالىق باقىلاۋ جۇرگىزىلەدى، سونداي-اق ءۇي جاعدايىندا مەديسينالىق كومەك كورسەتىلەدى.
مەديسينالىق ۇيىم قولدانىستاعى ستاندارتتارعا ساي زاماناۋي قۇرال-جابدىقتارمەن جابدىقتالعان، بۇل ءدال دياگنوستيكا مەن ءتيىمدى ەمدەۋدى قامتاماسىز ەتۋگە مۇمكىندىك بەرەدى. سونىمەن قاتار، مۇمكىندىگى شەكتەۋلى جاندار ءۇشىن دە قولايلى ءارى قولجەتىمدى جاعداي جاسالعان.
فيليالدا سيفرلىق رەنتگەن، مامموگراف، زاماناۋي ۋلترادىبىستىق زەرتتەۋ (ۋدز) جابدىقتارى، لور جانە وفتالمولوگ كابينەتتەرى، يزولياتورلارى بار بولەك سۇزگىلەر، جەكە زەرتحانا مەن ءدارىحانا جۇمىس ىستەيدى.
لور كابينەتى زاماناۋي لور-كومباينمەن جابدىقتالعان، ال وفتالمولوگ كابينەتى وفتالموسكوپپەن، اۆتورەفراكتومەترمەن، كوز ىشىلىك قىسىمدى جاناسپاي ولشەيتىن جانە بيوميكروسكوپيا جۇرگىزۋگە ارنالعان جابدىقتارمەن قامتىلعان.
اكۋشەر-گينەكولوگ دارىگەرىنىڭ كابينەتى زاماناۋي كوپفۋنكسيونالدى گينەكولوگيالىق ورىندىق، ۆيدەوكولپوسكوپ جانە شاعىن وتا جۇرگىزۋگە ارنالعان ەلەكتروكواگۋلياتورمەن جابدىقتالعان. جۇكتى ايەلدەر ءۇشىن مەديسينالىق-سانيتارلىق العاشقى كومەك كورسەتۋ دەڭگەيىندە ۇرىقتىڭ جاعدايىن جەدەل باقىلاۋعا مۇمكىندىك بەرەتىن كارديوتوكوگرافيا جۇرگىزۋ قاراستىرىلعان.
فيليال قولدانىستاعى مەديسينالىق ۇيىمدارعا تۇسەتىن جۇكتەمەنى ازايتىپ، قابىلداۋدى كۇتۋ ۋاقىتىن قىسقارتۋعا جانە تۇرعىنداردىڭ تۇرعىلىقتى جەرىنە بارىنشا جاقىن مەديسينالىق كومەك كورسەتۋگە مۇمكىندىك بەرەدى.
قازىرگى تاڭدا جەتىسۋ اۋدانىندا شامامەن 200 مىڭ ادام تۇرادى. ونىڭ ىشىندە 135 مىڭ تۇرعىن مەملەكەتتىك ەمحانالارعا تىركەلگەن، ال قالعاندارى قالانىڭ باسقا اۋداندارىنداعى مەديسينالىق ۇيىمداردا قىزمەت الادى. "قۇلاگەر" مەديسينالىق-سانيتارلىق العاشقى كومەك كورسەتۋ ورتالىعى فيليالىنىڭ ىسكە قوسىلۋى پاسيەنتتەردى قايتا ءبولۋدى قامتاماسىز ەتىپ، جەتىسۋ اۋدانى تۇرعىندارى ەسەبىنەن تىركەلگەن حالىق سانىن كەزەڭ-كەزەڭىمەن 15،5 مىڭنان 30 مىڭ ادامعا دەيىن ارتتىرۋعا مۇمكىندىك بەرەدى.
الماتىدا الداعى ۋاقىتتا نۇسىپبەكوۆ كوشەسى بويىندا №1 قالالىق ەمحانانىڭ فيليالىن، سەرىكبايەۆ كوشەسىندە جاڭا قالالىق ەمحانانى، ايباسوۆ پەن سايالى شاعىناۋداندارىندا ەكى دارىگەرلىك امبۋلاتوريانى اشۋ، سونداي-اق №4 قالالىق كلينيكالىق اۋرۋحانانى قايتا جاڭعىرتۋ جوسپارلانىپ وتىر.