الماتىداعى №2 قالالىق بالالار كلينيكالىق اۋرۋحاناسىندا سيرەك كەزدەسەتىن اياق-قول كەمىستىگىنە شالدىققان بالالارعا وتا جاسالدى. وپەراسيا بارىسىندا بۇرىن-سوڭدى قازاقستاندىق كلينيكالاردا قولدانىلماعان ەكسكليۋزيۆتى تەحنولوگيالار پايدالانىلدى. وتالاردى ۇيىمداستىرۋعا «ميلوسەرديە» ەرىكتىلەر قوعامى» قوعامدىق قورى مەن «Samruk-Kazyna Trust» الەۋمەتتىك جوبالاردى دامىتۋ قورى مۇرىندىق بولدى، دەپ حابارلايدى اۋرۋحانانىڭ باسپا ءسوز قىزمەتى.
«شەبەرلىك كلاسى شەڭبەرىندەگى وتالاردى ءبىزدىڭ دارىگەرلەر مەن قول-تابان ميكروحيرۋرگياسى سالاسىندا الەمگە تانىمال مامان، رەسەي حالىقتار دوستىعى ۋنيۆەرسيتەتى تراۆماتولوگيا جانە ورتوپەديا كافەدراسىنىڭ پروفەسسورى يگور گولۋبيەۆ بىرلەسىپ جاسادى. ءبىز اياق-قولدىڭ ءتۋابىتتى جانە جۇرە پايدا بولعان كەمىستىكتەرىنە شالدىققان كىشكەنتاي بەس پاسيەنتكە ءمامس شەڭبەرىندە وتا جاسادىق»، - دەيدى №2 قبكا ديرەكتورى مارات راباندياروۆ.
كلينيكالىق جاعىنان قاي-قايسىسى دا سيرەك كەزدەسەتىن اۋرۋلارعا جاسالعان بىرەگەي وپەراسيالارعا رەسەيلىك مامانمەن قاتار №2 قبكا تراۆماتولوگيا جانە ورتوپەديا بولىمشەسى مەڭگەرۋشىسى ەرلان سادىربالين، بالالار حيرۋرگى ءۇلجان سولتانبەكوۆا قاتىستى.
2023 جىلدىڭ شىلدەسىندە 6 جاستاعى ادەل مەن اناسىن جۇرگىنشى جولاعىنان ءوتىپ بارا جاتقان كەزدە كولىك قاعىپ كەتكەن. اناسى قاتتى جاراقات الماعانمەن، دوڭگەلەك استىندا قالىپ قويعان قىزدىڭ اياعىن كەسىپ تاستاۋعا تۋرا كەلىپتى. ونىڭ ۇستىنە، ساۋساقتارى دا قاتتى زاقىمدانعان. حالىقارالىق شەبەرلىك كلاسى بارىسىندا ادەل كەزەكتى حيرۋرگيالىق ەم الىپ، دارىگەرلەر ونىڭ ساۋساقتارىنىڭ ءپىشىنىن قالىپقا كەلتىرۋگە كۇش سالدى.
وتا ۇستەلىنە جاتقىزىلعان ەكىنشى بالانىڭ ەسىمى – شىنتاس. ول 2020 جىلى شومىلىپ ءجۇرىپ كوپىردەن سۋعا سەكىرگەن. سول جاق يىعىن سوعىپ، ومىرتقاسىنا، جۇيكە جۇيەسىنە زاقىم كەلگەن، سول قولى جانسىزدانىپ سالبىراپ قالىپتى. سودان بەرى بالاعا ەكى رەت كۇردەلى وتا جاسالدى. شەبەرلىك كلاسى بارىسىندا تاعى ءبىر حيرۋرگيالىق وتا جۇرگىزىلدى.
2022 جىلدىڭ جازىندا اتا-اناسى ءنۇراليدىڭ وڭ جاق قولىنداعى ءۇش ساۋساعىنىڭ قيمىلداماي قالعانىن اڭعارعان. ساۋساقتىڭ قوزعالىسىن قالپىنا كەلتىرۋ ءۇشىن وعان دا اتالعان شەبەرلىك كلاسى بارىسىندا شۇعىل تۇردە وتا جاسالدى.
ال، اتا-اناسى ءراتميردىڭ سول قولىنىڭ قيسايىپ كەتكەنىن 2023 جىلى جازدا بايقاپتى. وكىنىشكە وراي، ىسىك سالدارىنان قولدىڭ ءوسۋى تەجەلىپ، بۇگىندە وڭ قول سول قولد 5 سم قىسقا، ال دەر كەزىندە وتا جاسالماسا راتميرگە ءبىر قولدان ايىرىلىپ قالۋ ءقاۋپى ءتونىپ تۇر. سوندىقتان شەبەرلىك كلاسىندا بۇل بالاعا دا قولدىڭ ۇزىندىعىن قالپىنا كەلتىرۋگە باعىتتالعان رەكونسترۋكسيالىق وتا جاسالدى.
قورلاردىڭ كومەگىمەن ۇيىمداستىرىلعان شەبەرلىك كلاسى ارقىلى اۋىر كەمىستىك زاردابىن تارتىپ كەلە جاتقان بالالار الەمدىك دەڭگەيدەگى ماماننىڭ كومەگىنە جۇگىنىپ، جوعارى تەحنولوگيالىق وتا جاساتۋعا مۇمكىندىك الدى. وعان قوسا، رەسەيلىك پروفەسسور 20 ناۋقاسقا تەگىن كونسۋلتاسيا بەرىپ، 17 قازاقستاندىق مامانعا تەرى پلاستيكاسى سالاسىنداعى يننوۆاسيالىق تەحنيكالار مەن ميكروحيرۋرگيانىڭ قىر-سىرىن ۇيرەتتى. بۇل الداعى ۋاقىتتا وسىنداي كۇردەلى وتالاردى ءبىزدىڭ ەلىمىزدە دە جاساي باستاۋعا مۇمكىندىك بەرەتىن ستراتەگيالىق قادام، دەيدى مارات راباندياروۆ.