الماتىدا جىل سايىن ۇيىمداستىرىلاتىن تامىز پەداگوگيكالىق ءسامميتى بيىل «بولاشاق ءبىلىمى: ادال ازامات – بىلىكتى مامان» اتاۋىمەن 19 تامىز كۇنى رەسپۋبليكا سارايىندا وتەدى.
تامىز ءسامميتى – قالانىڭ ءبىلىم بەرۋ سالاسىنداعى باستى وقيعا. ول جىل سايىن پەداگوگتاردى، ساراپشىلاردى، مەملەكەتتىك جانە حالىقارالىق ۇيىمداردىڭ وكىلدەرىن، سونداي-اق، ءبىلىم بەرۋ ءىسىن دامىتۋعا مۇددەلى جانداردىڭ باسىن قوسادى.
ءىس-شارانىڭ ماقساتى – اشىق كاسىبي الاڭ قۇرۋ، تاجىريبە الماسۋ جانە ورتاق شەشىمدەر ىزدەۋ. ءسامميتتىڭ نەگىزگى وزەگى – ءبىلىم ساپاسى مەن قولجەتىمدىلىگى، ينكليۋزيۆتىلىك، زاماناۋي سىن-تەگەۋرىندەر جانە پەداگوگ ماماندىعىنىڭ بەدەلىن ارتتىرۋ.
سالتاناتتى ءبولىم اياسىندا مەملەكەتتىك ماراپاتتار، ونىڭ ىشىندە وقۋ-اعارتۋ مينيسترلىگىنىڭ ۆەدومستۆولىق ناگرادالارى، سونداي-اق الماتى قالاسى اكىمدىگى تاعايىنداعان «ۇزدىك ءبىلىم بەرۋ ۇيىمى – 2025» ارنايى سىيلىعى تابىستالادى.
قۇرمەتتى قوناقتاردىڭ قاتارىندا عىلىم جانە جوعارى ءبىلىم ءمينيسترى ساياسات نۇربەك، كەمبريدج ۋنيۆەرسيتەتىنىڭ پروفەسسورى، NTU (سينگاپۋر) دەكانى سايمون رەدفەرن، Wayground Quizizz AI (اقش) كومپانياسىنىڭ وكىلى حيمانشۋ اجمەرا جانە NTU پروفەسسورى چەن چۋن-ان بار.
باعدارلاما اياسىندا ءبىرقاتار تاقىرىپتىق سەسسيا وتەدى. وندا كاسىبي ءبىلىم بەرۋدىڭ بولاشاعى مەن جاڭا ەكونوميكاعا مامان دايارلاۋ، STEM/STEAM تاسىلدەرىن وقۋ ۇدەرىسىنە ەنگىزۋ، وقۋشىلاردىڭ قاۋىپسىزدىگى مەن پسيحوەموسيالىق جاعدايى، ينكليۋزيۆتى ءبىلىم بەرۋ مەن توزىمدىلىككە تاربيەلەۋ ماسەلەلەرى قارالادى.
ءىس-شارا قازاقستاندىق ەسترادا جۇلدىزدارى روزا رىمبايەۆا، نۇرلان ونەربايەۆ، «دوس-مۇقاسان» ءانسامبلى جانە دومبىراشى اسىلبەك ەڭسەپوۆتىڭ قاتىسۋىمەن وتەتىن مەرەكەلىك كونسەرتپەن تۇيىندەلەدى.
ب ا ق ءۇشىن بايلانىس تەلەفونى: +7 775 989 4746، اسان.