شاھارىمىزدا قالالىق قوعامدىق كەڭەستىڭ ۇيىتقى بولۋىمەن «سينتەتيكالىق ەسىرتكىقۇمارلىققا قارسى ءىس-قيمىل: الماتى قالاسىنىڭ تاجىريبەسى، كەدەرگىسى مەن كەلەشەگى» اتتى القالى جيىن ءوتتى.
وزەكتى الەۋمەتتىك ماندەگى ماسەلەگە ارنالعان باسقوسۋ جيىنىنا قالالىق سالالىق باسقارما ماماندارى، قۇزىرلى ورگان وكىلدەرى، دارىگەرلەر، پسيحولوگتار، قوعامدىق ۇيىمدار مەن ازاماتتىق قوعام مۇشەلەرى قاتىستى. جيىندى اشقان الماتى قالاسى قوعامدىق كەڭەسىنىڭ ءتوراعاسى التىناي كوبەيەۆا جيىلعان قاۋىمعا «دوڭگەلەك ۇستەل» ۇردىسىندەگى باسقوسۋدىڭ ماقساتىنا توقتالىپ، يگىلىكتى ىستە ساتتىلىك تىلەدى.
شارادا قالامىزداعى سينتەتيكالىق ناشاقورلىققا قارسى كۇرەستىڭ وزەكتى ماسەلەلەرى تالقىلاندى. باسقوسۋدا مەملەكەت تاراپىنان اتقارىلاتىن شارالار، ماماندار الدىنان شىعاتىن كەدەرگىلەر، ەسىرتكىگە تاۋەلدىلىكتىڭ الدىن الۋ مەن وعان كورسەتىلەر كومەكتى جاقسارتۋ جولدارى قاراستىرىلدى. القا-قوتان باسقوسۋعا قاتىسۋشىلار ءوزارا تاجىريبە الماسۋعا، اتالعان شارالاردى جەرگىلىكتى دەڭگەيدە جۇزەگە اسىرۋعا قاجەت پراكتيكالىق ۇسىنىستاردى تالداۋعا مۇمكىندىك تاپتى.
القالى جيىندى التىناي ورمانقالي قىزى مەن نۇرجان باۋىرجان ۇلى جۇرگىزىپ وتىردى. ق ر پارلامەنت سەناتىنىڭ دەپۋتاتى جاننا اسانوۆا اتالعان جيىنعا ونلاين تۇردە قاتىسىپ، الەۋمەتتىك اۋقىمدى باسقوسۋعا قاتىسۋشىلاردىڭ جاندى ديالوگقا ۇلاسۋىنا دەگەن يگى تىلەگىن ءبىلدىرىپ، كوبىنە-كوپ وتباسىلىق فاكتورمەن تىعىز بايلانىستى وسى ءبىر الەۋمەتتىك كەسەلدىڭ الدىن الۋعا قاتىستى لايىقتى باعدارىن بەردى. مودەراتور نۇرجان جاقىپوۆ 14 جاسقا دەيىنگى جاس ورەندەردى ۇلتتىق يدەولوگيالىق تۇرعىدا تاربيەلەۋدىڭ تۇجىرىمداماسىنا توقتالدى.
«ەسىرتكىگە اۋەس ءار الۋان مەكەمەلەردەن كەلگەن ەرەسەكتەر عانا ەمەس، كامەلەتكە تولماعان جەتكىنشەكتەر دە كەڭەس بەرۋىمىزدى قالاپ، كومەك سۇرايتىنى راس. بيىلدىڭ وزىندە ەسىرىتكىگە تاۋەلدى 12 جاسار بالاعا كومەك سۇراپ، كەڭەس الۋعا كەلدى. قازاقتا «اۋرۋىن جاسىرعان ولەدى» دەگەن بار، وسىنداي جاعداي ورىن الىپ وتىرعان سوڭ، مەملەكەت پەن قوعام بۇل وزەكتى ماسەلەگە ەرەكشە ءمان بەرىپ، ايرىقشا نازار اۋدارۋى قاجەت. مۇنىڭ ءوزى بۇگىنگى كۇنى ەسىرتكىگە وڭاي قول جەتكىزۋگە بولاتىنىنىڭ دالەلى ەمەس پە. كوڭىلگە قاياۋ تۇسىرەتىن مۇنداي كەلەڭسىز كورىنىس قورقىنىشقا اينالىپ، ۆيرتۋالدى تۇردە ەتەك الىپ بارادى، – دەگەن پسيحولوگ-ادديكتولوگ عاليا ءالجاپار قىزى ەسىرتكىگە تاۋەلدىلىككە دەيىنگى تۇلعانىڭ قالىپتاسۋ فاكتورلارىن ايتىپ بەردى.