قازاقستان سپورتشىلارى ۆاكسينا قابىلداۋعا شاقىرادى
الماتى مەن بۇكىل سپورت الەمىندە كوروناۆيرۋس پاندەمياسىنا بايلانىستى بۇقارالىق سپورت جارىستارى توقتاتىلادى نەمەسە اۋىستىرىلادى. الايدا كەيبىر جاعدايدا ءىس-شارالار وتەدى، ءبىراق كورەرمەندەرسىز. الماتى سپورتشىلارى تۋرنير مەن چەمپيوناتتارعا ەركىن قاتىسۋ ءۇشىن حالىقتى ۆاكسينالاۋعا شاقىردى6 دەپ حابارلادى Almaty-akshamy.kz. سەبەبى ولار بوس ستەندتەردەن شارشادى.
حوككەي الاڭىن جانكۇيەرلەرسىز، قولداۋ ايقايلارىنسىز، شۋلى ستەندتەرسىز ەلەستەتۋ مۇمكىن ەمەس. "الماتى" حوككەي كومانداسى ءوز جانكۇيەرلەرىمەن ءبىر وتباسى مۇشەلەرى سياقتى بىرگە، ءبىراق ىندەت سپورتشىلاردىڭ ۇلكەن جوسپارلارىنا كەدەرگى بولدى.
كوماندانىڭ قاقپاشىسى نيكيتا باجەنوۆ ولار ءالى دە بوس ستەندتەرگە، جەڭىسكە جەتەلەيتىن جانكۇيەرلەرىنىڭ بولماۋىنا ۇيرەنە الماي جۇرگەندەرىن ايتتى.
"جانكۇيەرسىز ويىن الاڭى قىزىقسىز. ءبىز ءۇشىن بۇل بەلگىلى ءبىر ىنتالاندىرۋ. وتكەن جىلى بارلىق جاتتىعۋ زالدارىنىڭ جابىلعانى ەسىمدە. ءبىز ساياباقتاردا جاتتىقتىق. سپورتسىز ءوزىمىزدى ۇستاۋ قيىن بولدى. كەيىننەن جاتتىعۋلار مەن جارىستار وتكىزۋگە رۇقسات بەرىلدى، ءبىراق جانكۇيەرلەرسىز. سوندىقتان جاپپاي ۆاكسينانىڭ باستالعانى تۋرالى حابارلانعاننان كەيىن مەن بۇرىنعى ومىرىمە ورالۋ ءۇشىن ۆاكسينا الدىم"، - دەدى نيكيتا باجەنوۆ.
"الماتى" حوككەي كلۋبىنىڭ جاتتىقتىرۋشىسى ۆالەريي سۆيريدوۆ ونىمەن كەلىسەتىنىن ايتادى. ول جانكۇيەرلەردىڭ قولداۋىنىڭ ارقاسىندا عانا سپورتشىلار جەڭىسكە جەتەدى دەپ سەنەدى.
"كوروناۆيرۋسپەن كۇرەستە اركىم ءوز ەركىمەن، ۆاكسينا الۋى كەرەك. مەن ايەلىم ەكەۋمىز وسكەمەندە ەكپە الدىق. ءبىزدىڭ حالقىمىز بىرىگىپ، كەرىسىنشە، ۆاكسينا جوق ەلدەردىڭ مىسالدارىنا قاراپ، وزدەرىن ءقاۋىپتى ينفەكسيادان قورعاعىسى كەلەدى. ءبىزدىڭ ەلدە ءوزىڭىزدى اۋرۋدان قورعاۋعا جانە ومىردەن ءلاززات الۋعا بارلىق مۇمكىندىكتەر بار"، - دەيدى ۆالەريي سۆيريدوۆ.
الماتىنىڭ تاعى ءبىر سپورتشىسى، تاەكۆاندودان حالىقارالىق دارەجەدەگى سپورت شەبەرى، ازيا ويىندارىنىڭ قولا جۇلدەگەرى فاريزا الدوڭعاروۆا كوروناۆيرۋس ىندەتىنىڭ جاتتىعۋ پروسەسىنە كەدەرگى كەلتىرگەنىن ايتتى. الايدا، ۆاكسينانىڭ پايدا بولۋى الەمدەگى بارلىق سپورتشىلارعا وليمپيادا ويىندارىنا قاتىسۋعا مۇمكىندىك بەرەدى. سونداي-اق جارىسقا قاتىسۋ ءۇشىن ليسەنزيا الۋ كەرەك. بۇگىندە فاريزا ءوز ەركىمەن ەكپە الدى.
"ءوزىمدى جاقسى سەزىنەمىن، جاتتىعۋلار كەستە بويىنشا جۇرەدى. مەن ۆاكسينانى ءوزىمدى جانە جاقىندارىمدى قورعاۋ ءۇشىن الدىم، سونداي-اق جارىستارعا قاتىسقىم كەلەدى. مەن باسقالار كوروناۆيرۋسپەن اۋىرماۋ ءۇشىن ۋايىمدايمىن"، - دەدى فاريزا الدوڭعاروۆا.
ۆاكسينالاۋ تۋرالى شەشىمدى دجيۋ-دجيتسۋدان سپورت شەبەرى، ازيا ويىندارىنىڭ جۇلدەگەرى ريزات ماحاشيەۆ تا قابىلدادى. اتاقتى سپورت شەبەرىنىڭ وتباسىندا قايعىلى وقيعالار ورىن الدى، تۋىستارى مەن دوستارى اۋرۋدى جەڭە المادى.
"اۋرۋدىڭ كەسىرىنەن جاقىن ادامدارىمنان ايىرىلۋ وڭاي بولمادى. مەن باسقالار سياقتى بۇل ىندەتتىڭ ەمىنىڭ پايدا بولۋىن كۇتتىم. عالىمدار ونى ويلاپ تاپقان سوڭ، ءوزىمنىڭ جانە جاقىندارىمنىڭ دەنساۋلىعى ءۇشىن ۆاكسينانىڭ ەكى كومپونەنتىن دە الدىم"، - دەيدى ريزات ماحاشيەۆ.
سپورت شەبەرى ۇكىمەتكە قالا تۇرعىندارىن تەگىن ۆاكسينامەن قامتاماسىز ەتكەنى ءۇشىن العىس بىلدىرەدى. ول ۆاكسينا العاننان كەيىن ءوزىن جايلى سەزىنگەنىن، جاتتىعۋعا، قوعامدىق ورىندارعا، ۇيگە الاڭسىز باراتىنىن ايتتى.
ءسوز سوڭىندا ريزات ماحاشيەۆ ءوزى اينالىساتىن سپورت تۇرىندە اۋرۋدىڭ كەسىرىنەن ءوزىنىڭ فورماسىن جوعالتۋعا بولمايتىنىن ايتتى. ادامدار ءۇشىن كوروناۆيرۋستان ساقتانۋدىڭ جالعىز ءتيىمدى جولى – ۆاكسينا الۋ.