الماتى وبلىسى تۇرعىندارى سالىققا قانشا قارىز؟

زاڭعا سايكەس ماجبۇرلەپ ءوندىرىپ الۋ جۇمىستارى جالعاسىپ جاتىر.

الماتى وبلىستىق مەملەكەتتىك كىرىستەر دەپارتامەنتىنىڭ باستاماسىمەن ازاماتتاردىڭ سالىق بەرەشەگىن تەكسەرۋ شاراسى ءوتتى، دەپ حابارلايدى Almaty-akshamy.kz

ءىس-شارا وبلىستىق ىشكى ىستەر دەپارتامەنتى جانە جەكە سوت ورىنداۋشىلار پالاتاسىمەن بىرلەسە ۇيىمداستىرىلدى. باستاما اياسىندا «بورىشكەر» رەيدتىك ءىس-شاراسى ىلە جانە تالعار اۋدانى ماڭىنداعى رەسپۋبليكالىق ماڭىزى بار كۇرە جولدىڭ بويىندا وتكىزىلدى.

شارا اياسىندا كولىك قۇرالدارىنىڭ سالىعىن تولەمەگەن جەكە تۇلعالاردىڭ اۆتوموبيلدەرى جەكە سوت ورىنداۋشىسىنىڭ قاۋلىسىمەن ايىپ تۇراقتارىنا قويىلدى، سالىقتارىن تولەۋگە مىندەتتەلدى.

ءقازىر الماتى وبلىسى بويىنشا 35 461 جەكە تۇلعانىڭ 2،1 ملرد تەڭگە سالىققا بەرەشەگى بار. جىل باسىنان بەرى جەكە سوت ورىنداۋشىلارىنا  1،3 ملرد تەڭگەگە 42 217 سالىق بۇيرىعى شىعارىلدى.

وتكەن جىلداردا قارىزى بار جەكە تۇلعالاردى قوسا العاندا جىل باسىنان بەرى 153 690 جەكە تۇلعادان 2،6 ملرد تەڭگە سالىق ءوندىرىلدى. ءقازىر وسى باعىتتا زاڭعا سايكەس ماجبۇرلەپ ءوندىرىپ الۋ جۇمىستارى جالعاسىپ جاتىر.

وبلىس بويىنشا 2021 جىل ءۇشىن 2022 جىلى 150 217 جەكە تۇلعالاردىڭ 442 165 اۆتوكولىكتەرىنە 6،5 ملرد تەڭگە ەسەپتەلدى.

بۇگىنگى تاڭدا وبلىس بويىنشا جەرگىلىكتى بيۋدجەتكە 6،2 ملرد تەڭگە ءتۇستى.