Reseıdíń NTV arnasyndaǵy "Zvezdy" ázíl-ospaq shouynyń fınaly qazaqstandyq kórermen arasynda qyzu talqyǵa tústí. Áleumettík jelíden "Astana"qūramasyna qoldau bíldíríp, shashyn tyqyrlap alyp tastap, Fılıpp Kırkorovty qarǵap-sílep jatqan qazaqstandyqtardyń jazbasyn kózíńíz shalǵan bolar. Būl neden shyqty? Reseılík ártístí nege qazaqstandyqtar "boıkottap" jatyr? Aqshamnews.kz tílshísí kóptíń talqysyna túsken jaǵdaıdyń jaı-japsaryn túsíndíredí.
Qazaqstandyqtar shulatqan "Zvezdy" shouy degen ne?
"Zvezdy" – NTV arnasyndaǵy ázíl-ospaq baǵytyndaǵy telejoba. Baǵdarlamany Azamat Musagalıev júrgízedí. Jobada ár óńírdí/komandany belgílí tūlǵalar bastap, túrlí ázíl saıystarynda baq synaıdy. Fınalda bírneshe komanda óner kórsetíp, sońǵy kezeńde eń kóp ūpaı jınaǵan ūjymdar basty júlde úshín básekege túsedí. Bıylǵy fınalda 20 mıllıon rubl (shamamen 129 mln teńge) sarapqa salynǵany aıtyldy. Al qatysushylar onyń bír bólígín qaıyrymdylyqqa baǵyttaudy josparlaǵan. Būl jobanyń 2-mausymy bolatyn. Byltyr ǵana tūsauy kesílgen Musagalıevtyń jobasynda Denıs Dorohov jáne "Regıony" komandasy jeńgen bolatyn.
"Astana" qūramasy fınalda qalaı óner kórsettí?
Fınaldyq básekede qazaqstandyq "Astana" komandasy sońyna deıín tartysty oıyn kórsettí. Bírneshe kezeńnen tūratyn jobanyń ár shyǵarylymynda súrínbeı, qaǵytpa qaljyńymen kórermenníń kóńílínen shyqqan "Astanalyqtar" fınalda da, Ivan Abramovtyń (reseılík stendap-komık - esk.) "Komanda mechty" komandasymen kezdesíp, nátıjesínde ekí ūjym da 22 ūpaıdan jınady.
Eń qyzyǵy, olar "Shashtarazda bolǵan jaǵdaı" nómerínde Anatolıı Tsoıdyń (tanymal ánshí, Qazaqstan tumasy - esk.) shashyn sahnada alyp tastaıdy. Odan keıín komandalastary da túgel shashtaryn qyrqyp tastap, erlík tanytady. Ázíl úshín bolsa da, "Astanalyqtardyń" bírlígín kórsetken nómerge reseılík kórermen ornynan tūryp, zor qoshemet kórsettí. Típtí keıbírí kózíne jas aldy.
Kırkorovtyń “ádíletsíz sheshímí”
Qazylar alqasynyń baǵalau sátínde teń túsken qos komanda úshín ("Astana" men "Komanda mechty") Fılıpp Kırkorovtyń dausy sheshushí ról oınady. Ol qazaqstandyqtarǵa ornynan qasqaıyp tūryp qoshemet kórsetse de, "Komanda mechty" ūjymyna – 6 ball, al "Astanaǵa" – 3 ball qoıyp, nátıjesínde qazaqstandyq komanda ekínshí orynǵa tūraqtady.
Osy sheshímnen keıín jelíde ekíūdaı píkír kúsheıdí: bír bólígí būl – qazylar alqasynyń subektıv tańdauy dese, endí bír bólígí "ádíletsíz boldy" dep baǵalady. Áleumettík jelíde Kırkorovtyń paraqshasyna da píkírler kóptep jazylyp, keı qoldanushylar onyń Qazaqstandaǵy kontsertteríne barmaıtynyn aıtyp, “cancel” formatyndaǵy narazylyq bíldírgen. Talqylanyp jatqan jazbalar arasynda "Bastanyń" da sheshímíne kelíspegender "kontsertteríne boıkot" jarıyalap jatyr.
Qysqasy, kórermenníń kópshílígí "Astananyń" ázílderí kóbírek kúldírgenín alǵa tartyp, qazylar baǵasyn qabyldaı almaǵanyn ashyq aıtyp jatyr.
Shash alu chellendjí nemese "Astanalyqtarǵa" qoldau
Fınaldan keıíngí eń erekshe reaktsıyalardyń bírí – áleumettík jelídegí "taqyrbas chellendjníń" tarauy boldy. Qazaqstandyq jankúıerler "Astana" komandasyn qoldau belgísí retínde shashtaryn tyqyrlap alyp, foto-vıdeolaryn jarıyalaı bastady. Chellendjdíń mání – komandaǵa moraldyq qoldau kórsetu árí Kırkorovtyń sheshímíne sımvolıkalyq “jauap” beru retínde túsíndírílíp jatyr.
Qazír būl úrdíske alǵash ret basyn taqyrlap jatqan adamdar da qosylyp, būl qūbylys áleumettík jelíde keń tarap otyr. Al Fılıpp Kırkorov ázírge būl dau men chellendjge qatysty resmı píkír bíldírmegení aıtylady.
Tanymal shoumen, ázílkesh, "Astana" komandasynyń múshesí Erkebūlan Myrzabek oıynnan keıín jazba jarıyalady. Onda ol:
«Būl kadr efırde bolǵan joq. Dál osy sátte bíz óz elímíz úshín, óz komandamyz úshín maqtanysh sezímín keshtík. Zal bízdíń nómerge tūryp qoshemet soqty. Būl - fınaldaǵy ánnen keıín emes, dál nómerdíń ózíne kórsetílgen qūrmet! Men sol sátte ǵana qandaı eńbek jasaǵanymyzdy, qandaı úlken jūmys atqarǵanymyzdy túsíndím. Sondyqtan kózíme jas keldí. Iá, men jyladym jáne būdan ūyalmaımyn. Bíz óz “shyńymyzdy” álí talaı būzamyz, elímízdí álemge taǵy da tanytamyz. Maqsat qoıdyq, soǵan jetemíz. Súıíspenshílíkpen árí qūrmetpen, "Astana" komandasy, - dep jazdy Erkebūlan Myrzabek.