Qazaqstan Respublıkasynyń Qorǵanys mınıstrí avıatsıya generaly-leıtenanty Dáuren Qosanov Armıya úıí bazasynda Defense Tech IT Park qorǵanys tehnologıyalary ortalyǵyn ashty, – dep habarlaıdy aqshamnews.kz tílshísí.
Būl ınnovatsıyalyq alań Qaruly kúshter men ūlttyq qauípsízdík júıesí múddesí úshín otandyq tehnologıyalyq sheshímderdí ázírleu men engízu maqsatynda qūrylǵan. Freedom Holding Corp. qoldauymen qūrylǵan jobanyń tanystyrylymyna Jasandy ıntellekt jáne tsıfrlyq damu vıtse-mınıstrí Dmıtrıı Mun, Freedom Holding Corp. kompanıyasynyń bas atqarushy dırektory Tımur Turlov, sondaı-aq IT-ındustrıya jáne ǵylymı qauymdastyq ókílderí qatysty.
Defense Tech IT Park – būl Qorǵanys mınıstrlígíníń 2022 jyldan bastap júzege asyryp kele jatqan Defense Tech bastamasynyń damu kezeńderíníń bírí. Ol ásker men qauípsízdík júıesíníń qajettílígí úshín ūlttyq ınnovatsıyalyq ekojúıení qalyptastyruǵa baǵyttalǵan. Jobany ázírleushíler jańa alańnyń múmkíndíkterín kórsetíp, otandyq IT-kompanıyalar men startap-komandalardyń tsıfrlyq tehnologıyalar, beınebaqylau júıelerí, derekterdí taldau, telekommunıkatsıyalar jáne jasandy sputnıktík sheshímder salasyndaǵy ınnovatsıyalyq jobalardy tanystyrdy.
Qorǵanys mınıstrí avıatsıya generaly-leıtenanty Dáuren Qosanov ortalyqtyń qūryluy elímízdíń tehnologıyalyq áleuetín nyǵaıtuǵa jáne zamanauı ázírlemelerdí áskerge jyldam engízuge baǵyttalǵanyn atap óttí.
– Búgíngí tańda memlekettíń qorǵanys qabíletí tíkeleı tehnologıyalyq damuǵa baılanysty. Bízdíń basty míndetímíz – óz ıdeyalarymyzdy áskerge praktıkalyq tūrǵyda engízu jolyn qysqartu, – dedí qorǵanys vedomstvosynyń basshysy.
Óz kezegínde Freedom Holding Corp. kompanıyasynyń bas atqarushy dırektory Tımur Turlov jańa alań tehnologıyalar men qorǵanys ázírlemelerí salasyndaǵy jas mamandar úshín tartymdy ortalyqqa aınalatynyn atap óttí.
«Bíz mūnda Defense Tech Hub tehnologıyalyq bílím beru alańyn qūrdyq. Būl jerde ÍT salasyndaǵy studentter, onyń íshínde áskerı kafedralarda bílím alyp júrgender, praktıkalyq daǵdylaryn jetíldíríp, hakatondar men akseleratsıyalyq baǵdarlamalarǵa qatysa alady», - dedí óz sózínde.
Qorǵanys mınıstríníń tsıfrlyq damu máselelerí jóníndegí orynbasary Darhan Ahmedıev Defense Tech IT Park bolashaqta perspektıvalyq tehnologıyalyq jobalardy ízdeu jáne tańdau, ázírleushílerdí ıdeyadan prototıp jasauǵa deıín qoldau jáne sheshímderdí áskerde pılottyq engízuge daıyndau alańy bolatynyn atap óttí. Jańa platforma qorǵanys vedomstvosy, ǵylymı ūıymdar jáne tehnologıyalyq bıznes arasyndaǵy júıelí ózara árekettestíktí qalyptastyruǵa, sondaı-aq Qazaqstannyń qorǵanys jáne qauípsízdík múddesí úshín ınnovatsıyalardy jedel engízuge múmkíndík beredí.