Jylytu mausymy bastalǵaly berí Almatyda 153 órt tírkeldí.
Óńírlík kommunıkatsıyalar qyzmetínde ótken brıfıngte Almaty TJD Memlekettík órt baqylauy basqarmasynyń bas mamany Dulat Jandar osylaı dedí. Onyń aıtuynsha, ekí adam qaza tauyp, taǵy úsh adam ártúrlí jaraqat alǵan, - dep habarlaıdy aqshamnews.kz.
Almatyda jylytu mausymy qala ákímíníń qaulysyna sáıkes 8 qazanda resmı túrde bastaldy. Būl kezeńde peshterdí, gaz jabdyqtary men elektr jylytqyshtaryn paıdalanu órt qaupín edáuír arttyratyndyqtan, qūtqaru qyzmetí jyldaǵydaı qauíptíń aldyn alatyn jūmystardy kúsheıte túsedí.
Gazdan ulanudy erekshe baqylauda ūstap otyrmyz
Bıylǵy jylytu mausymynda qalada tabıǵı gazdan ulanǵan úsh derek tírkeldí. Alty adam zardap shekken, olardyń tórteuí — balalar.
Tótenshe jaǵdaılar departamentíníń málímetínshe, qalada 151 myńnan astam jeke tūrǵyn úı esepke alynǵan. Myna sanattaǵy úıler erekshe nazarda eken:
• qatty otynmen jylytylatyn 1 450 úı;
• qańqaly-qamysty tıptegí 5 605 eskí úı.
Sonymen qatar áleumettík osal otbasylar tūratyn 689 úı men qıyn adamdar tūratyn 4 myńnan astam úı jeke sanatqa engízílgen.
Kómírtek totyǵy datchıkterí ómírdí saqtaıdy
Aldyn aludyń tıímdí tásílderíníń bírí — kómírtek totyǵyn anyqtaıtyn datchıkter ornatu. 2018 jyldan berí qala men audan ákímdíkteríníń qoldauymen jeke úılerge osyndaı 1 740 datchık ornatylǵan.
2025–2026 jyly jylytu mausymynyń ózínde 280 qūrylǵy ornatyldy. Olar kómírtek totyǵynyń qauíptí deńgeıín der kezínde anyqtap, oqys oqıǵanyń aldyn aluǵa kómektesedí.
Auqymdy profılaktıkalyq jūmys
Jylytu mausymyna daıyndyq 15 tamyzdan bastalǵan. Osy uaqyttan berí qūtqarushylar keń kólemdí aqparattyq-túsíndíru nauqanyn júrgízíp keledí.
Órt qauípsízdígí aılyǵy ūıymdastyrylyp, onyń ayasynda TJD qyzmetkerlerí:
• jeke sektordaǵy úılerdí aralap shyǵady;
• tūrǵyndarmen kezdesedí;
• órt qauípsízdígí erejelerín túsíndíríp, jadynamalar taratady.
«Qauípsíz pesh», «Taza mūrja» men «Qol ūshyn beru» aktsıyasyna erekshe kóńíl bólínedí. Osy ís-sharanyń barysynda áleumettík osal toptar men táuekel tobyna jatatyn azamattardyń úıí profılaktıkalyq jūmyspen qamtyldy.
Aldyn aludyń jańa tehnologıyalary
Qūtqarushylar qūlaqtandyrudyń jańa tásílín de qoldanyp jatyr.
Máselen, arnauly QR-kodtar ázírlengen. Sol arqyly tūrǵyndar Telegram-bot arqyly órt qauípsízdígíníń ís- sharalary turaly aqparat ala alady. Sonymen qatar adam kóp jıylatyn jerdegí LED-ekrandarda oqytatyn beınerolıkter kórsetílíp jatyr.
TJD qyzmetkerlerí mektepter men balabaqshalarda da profılaktıkalyq sabaq ótkízíp, qauípsízdík erejesín túsíndíredí.
Ūyaly baılanys operatorlarymen bírlesíp órt qauípsízdígí erejelerí turaly SMS-habarlamalar taratyldy. Būl aqparat 7,6 mıllıonnan astam abonentke jettí.
Negízgí qauípsízdík erejelerí
Qūtqarushylar tūrǵyndarǵa órttíń aldyn aluǵa kómektesetín bírneshe qarapaıym erejení eske salady:
• mūrjany kemínde ekí aıda bír ret kúıeden tazalau;
• peshtí shamadan tys qyzdyrmau, janyna janǵysh zat qoımau;
• gaz peshín paıdalanu kezínde nūsqaulyqty qatań saqtau;
• janyp tūrǵan pesh pen qosuly elektr qūralyn qarausyz qaldyrmau;
• otty baqylaudy balalarǵa tapsyrmau;
• síríńke men ottyqtardy balalardyń qoly jetpeıtín jerde saqtau;
• elektr symynyń jaǵdaıyn únemí tekseru, ásírese jylytqyshtardy qoldanǵanda.
Órt bolǵan jaǵdaıda dereu 101 nemese 112 nómírleríne habarlasu qajet.