«Jas búrkít» qatary tolyqty: Almatyda áskerı-patrıottyq synyp ashyldy, – dep habarlaıdy aqshamnews.kz tílshísí.
Almaty qalasyndaǵy №118 mektep-gımnazıyasynda «Ūlttyq ūlan – patrıotızm men batyldyq» aktsıyasy ayasynda jas ūrpaqqa áskerı-patrıottyq tárbıe beruge baǵyttalǵan mańyzdy ís-shara óttí. Taǵylymy mol jıyn barysynda «Jas búrkít» áskerı-patrıottyq, sporttyq synybynyń saltanatty ashylu rásímí ūıymdastyrylyp, Qazaqstan Respublıkasy Keńes Odaǵynyń Batyry, gvardıya polkovnıgí Bauyrjan Momyshūly atyndaǵy 5571 áskerı bólímí men bílím ordasy arasynda yntymaqtastyq turaly memorandumǵa qol qoıyldy.
Saltanatty sharaǵa áskerı bólím basshylyǵy, ūstazdar qauymy, ata-analar men oqushylar qatysty. Jıyn Memlekettík Tudyń engízílíp, Qazaqstan Respublıkasynyń Ánūranynyń oryndaluymen bastaldy. Áskerı qyzmetshílerdíń saptyq kórínísí men Tu tobynyń shyǵuy oqushylarǵa erekshe áser syılap, patrıottyq ruhty asqaqtatty.
Ís-sharanyń mańyzdy kezeńderíníń bírí – 3 «Z» synybynyń 33 oqushysynyń «Jas búrkít» qataryna qabyldanuy boldy. Jas órender saltanatty túrde ant qabyldap, Otanǵa adal qyzmet etuge, elín qūrmettep, patrıottyq ruh pen tártíptí bıík ūstauǵa sert berdí.
Shara barysynda áskerı-patrıottyq tárbıeníń mańyzy keńínen nasıhattalyp, jas buyndy eljandylyqqa bauludyń mání aıtyldy. Sonymen qatar, 5571 áskerı bólímíníń áskerı orkestrí patrıottyq ánder oryndap, merekelík keshtíń kórkín qyzdyrdy.
5571 áskerı bólímí komandıríníń tárbıe jáne áleumettík-qūqyqtyq jūmystar jóníndegí orynbasary podpolkovnık Ūlyqbek Qaraev mūndaı bastamalardyń óskeleń ūrpaq tárbıesíndegí rólíne toqtaldy.
– Búgíngí «Jas búrkít» synybynyń ashyluy – jas ūrpaqtyń boıynda otansúıgíshtík qasıettí qalyptastyryp, áskerı qyzmetke degen qyzyǵushylyqty arttyruǵa baǵyttalǵan mańyzdy qadam. Elín súıetín, tártíptí, ruhy bıík jastar – memlekettíń jarqyn bolashaǵy. Sondyqtan mūndaı tárbıelík sharalardyń mańyzy zor, – dedí podpolkovnık Ūlyqbek Qaraev.
Osyndaı taǵylymdy ís-sharalar jas buynnyń boıynda patrıottyq ruhty nyǵaıtyp, Otan qorǵau ísíne degen jauapkershílík sezímín qalyptastyruǵa úlken úles qosady.
Qazaqstan Respublıkasy Ūlttyq ūlany
«Ońtústík» óńírlík qolbasshylyǵynyń baspasóz qyzmetí