Ūlttyq bank tóraǵasy Tımur Súleımenov qazaqstandyqtardy dollardy jınaqtau jáne saqtau qūraly retínde qabyldamauǵa shaqyrdy. Būl turaly ol jurnalısterdíń sūraqtaryna jauap bere otyryp málímdedí, – dep habarlaıdy aqshamnews.kz tílshísí.
Onyń aıtuynsha, ekonomıkalyq jaǵdaıdyń ózgergeníne qaramastan, kóptegen adam álí kúnge deıín sheteldík valyutaǵa ıek artady.
"Meníń 2022 jyly dollar eń joǵary shegíne jetkende 550 teńgeden satyp alyp, álí kúnge deıín ūstap otyrǵan tanystarym bar. Dollar turaly oılaudy toqtatu kerek. Dollar jınaqtau qūraly emes", - dedí Súleımenov.
Ol Qazaqstanda aqshany jınaqtap, saqtaudyń balamaly jáne tıímdírek qūraldary baryn atap óttí.
"Bízde teńge bar, telefon arqyly-aq ashuǵa bolatyn depozıtter bar. Sonymen qatar, KASE jáne AHQO sıyaqty tolyqqandy qarjy naryqtary jūmys ísteıdí. Kvazımemlekettík kompanıyalardyń oblıgatsıyalary, Qarjy mınıstrlígíníń memlekettík baǵaly qaǵazdary bar – būl kírísí joǵary jáne táuekelí tómen senímdí qūraldar", - dedí ol.
Ūlttyq bank basshysy elímízde "kúrt devalvatsıyalar men gıperınflyatsıya dáuírí artta qalǵanyn" alǵa tartty.
"Dollar aqsha saqtaudyń negízgí tásílí bolǵan zaman óttí. Bíz Qazaqstanda tūramyz, teńgemen tabys tauyp, teńgemen jūmsaımyz. Shetel valyutasy tek shetelge shyǵu úshín ǵana qajet", - dedí Súleımenov.
Onyń píkírínshe, ūlttyq valyutanyń nyǵayuy azamattardyń senímíne tíkeleı baılanysty.
"Óz valyutamyzǵa neǵūrlym kóp sením artsaq, ol soǵūrlym myqty bolady", - dep túıíndedí ol.
Sondaı-aq Súleımenov óz jınaqtarynyń basym bólígín teńgemen saqtaıtynyn aıtty.
"Meníń shetel valyutasynda shaǵyn depozıtím bar, bíraq jınaǵymnyń negízgí bólígí - ūlttyq valyutada", - dedí Ūlttyq bank basshysy.