Qazaqstanda Biryńǵaı ulttyq testileýdiń jańa halyqaralyq formaty paıda bolýy múmkin.
Bul týraly Ǵylym jáne joǵary bilim mınıstri Saıasat Nurbek A málimdedi, - dep habarlaıdy aqshamnews.kz.
Mınıstrdiń aıtýynsha, jańa test qazaqstandyq túlekterge álemniń kez kelgen joǵary oqý ornyna, sondaı-aq sheteldik ýnıversıtetterdiń Qazaqstandaǵy fılıaldaryna túsýge múmkindik beredi. Joba ázirge daıyndyq kezeńinde, al ony tolyq engizý 2027 jyldan erte bastalmaıdy.
Saıasat Nurbek qazirgi UBT-nyń keıbir halyqaralyq ýnıversıtetter tarapynan senimsizdikpen qabyldanatynyn atap ótti. Sondyqtan jahandyq standarttarǵa saı, álemdik ýnıversıtetter moıyndaıtyn test qajet.
«Bul jańa test joǵary oqý ornyna túsý úshin ámbebap, halyqaralyq deńgeıde moıyndalatyn formatta bolýy tıis. Ony ázirleýge keminde taǵy bir jyl qajet. 2027 jyldan bastap iske asady dep josparlap otyrmyz», – dedi mınıstr.
Jańa formatty jasaýǵa Qazaqstan mamandary Educational Testing Service (ETS) uıymynda oqýdan ótedi. Bul — SAT, TOEFL sekildi halyqaralyq testterdiń avtory.
Al dástúrli UBT qajettilik joıylǵanǵa deıin ótkizile beredi. Mınıstrdiń aıtýynsha, bolashaqta talapkerler halyqaralyq testti jappaı qoldana bastasa, UBT-ǵa degen suranys birtindep azaıýy múmkin.