Túrkístan oblysynda Dımash Qūdaıbergen atqarushy prodyuserlík etetín Voice Beyond Horizon halyqaralyq muzykalyq shouynyń túsírílímí bastaldy.
Jobaǵa Qazaqstan, Qyrǵyz Respublıkasy, Qytaı, Italıya, Malaızıya jáne Serbıya elderíníń ánshílerí qatysuda, - dep habarlaıdy Aqshamnews.kz.
Qatysushylar Túrkístan qalasyna poıyzben keldí. Túsírílím barysynda olar óńírdíń basty turıstík jáne mádenı nysandarynda bolady. Atap aıtqanda, Qoja Ahmet Yasauı kesenesí ornalasqan «Ázíret Sūltan» memlekettík tarıhı-mádenı qoryq-muzeıínde, kóne Otyrar qalashyǵynda, Karavansaray turıstík keshenínde jáne etnoauylda túsírílím jūmystaryn júrgízedí.
Baıqau qatysushylarynyń ónerín arnaıy shaqyrylǵan halyqaralyq sarapshylar baǵalaıdy.
Túrkístandaǵy túsírílím ayaqtalǵan soń joba shyǵarmashylyq saparyn elímízdíń basqa óńírlerínde jalǵastyrady. Halyqaralyq shou Mańǵystau, Almaty jáne Aqmola oblystarynda, sondaı-aq Almaty men Astana qalalarynda ótedí. Jobanyń fınaldyq kezeńí elordada ūıymdastyrylmaq.
Aıta keteıík, Voice Beyond Horizon jobasyn Dımash Qūdaıbergen Qytaıdyń Hunan Broadcasting System telearnasymen bírlese júzege asyruda. Atalǵan telearna men onyń Mango TV tsıfrlyq platformasyn kúníne 210 mıllıonnan astam kórermen tamashalaıdy. Osy arqyly álemdík audıtorıya Qazaqstannyń turıstík áleuetímen tanysuǵa múmkíndík alady.
Joba Qazaqstan Respublıkasynyń Turızm jáne sport mınıstrlígí, Mádenıet jáne aqparat mınıstrlígí, Kazakh Tourism ūlttyq kompanıyasy men jergílíktí atqarushy organdardyń qoldauyna ıe.