Ankarada Túrkí mádenıetí halyqaralyq ūıymynda (TÚRKSOI) túrkí halyqtarynyń ruhanı-mádenı mūrasyndaǵy ana beınesíne arnalǵan «Túrkí álemíníń analary: dástúr jáne qazírgí zaman» atty halyqaralyq dóńgelek ústel men «Túrkí álemíníń analary» atty halyqaralyq kórme óttí.
Sharanyń maqsaty – túrkí órkenıetíne tán ana bolmysyn, meıírím men danalyqty, ruhanı qaısarlyqty jáne ūrpaq sabaqtastyǵyn dárípteu. Ís-shara halyqaralyq «Túrkí álemíníń analary» kórmesí ayasynda ūıymdastyrylyp, analar tūlǵasy arqyly túrkí halyqtarynyń ortaq mádenı kodyn tanystyruǵa baǵyttaldy.
Dóńgelek ústel barysynda túrkí halyqtaryndaǵy anaǵa qūrmet kórsetu dástúríníń tarıhı-mádenı negízderí, áıeldíń qoǵamdaǵy jáne otbasyndaǵy orny, ūlttyq qūndylyqtardy saqtau tájírıbesí jan-jaqty talqylandy. Qatysushylar gumanıtarlyq, mádenı jáne bílím beru salalarynda ortaq jobalar ázírleuge nıet bíldírdí.
Jıynǵa Qazaqstan, Túrkıya, Túríkmenstan elderínen memlekettík, ǵylymı jáne qoǵamdyq ūıymdardyń ókílderí qatysty. Atap aıtqanda: Ís-sharaǵa Túrkıya Respublıkasynyń Otbasy jáne áleumettík qyzmetter vıtse-mınıstrí Leman Ienıgún, TÚRKSOI Bas hatshysy Sūltan Raev, Qazaqstannyń TÚRKSOI-daǵy ókílí Nyshangúl Qarataeva, Túríkmenstannyń TÚRKSOI-daǵy ókílí Lachın Ovazgeldıeva, Túrkıya Respublıkasynyń Ádílet jáne damu partıyasynyń Túrkí memleketterímen baılanystar jóníndegí tóraǵa orynbasary doktor Reshıde Yuksel, Qazaqstan halqy Assambleyasy Respublıkalyq Analar keńesíníń tóraǵasy, Qazaqstan Respublıkasy Prezıdentí janyndaǵy Áıelder ísterí jáne otbasylyq sayasat jóníndegí ūlttyq komıssıyanyń múshesí Nazıpa Shanaı, QR Ūlttyq muzeıí dırektorynyń ǵylymı jūmys jóníndegí orynbasary Aqmaral Ibraeva, YuNESKO qamqorlyǵyndaǵy «Mádenıetterdí jaqyndastyru ortalyǵy» muzeıí dırektorynyń orynbasary Saltanat Áshímova, «Mádenıetterdíń ózara árekettesu ortalyǵy» qoǵamdyq bírlestígíníń dırektory Úmíthan Mūnalbaeva, « TURKTAV» qorynyń atqarushy dırektory Ásel Lahaeva, sondaı-aq túrkí álemíníń áıel kóshbasshylary qatysty.
Sharada qūttyqtau sózder men taqyryptyq bayandamalar ūsynylyp, túrkí halyqtary arasyndaǵy ruhanı yntymaqtastyqty arttyru baǵytyndaǵy píkírtalastar óttí. Kórme ayasynda túrkí mádenıetíndegí Ana beınesí men ruhanı sabaqtastyqty beıneleıtín jádígerler kópshílík nazaryna ūsynyldy.
Būdan bólek, Almaty oblysy «Anaǵa qūrmet» muzeıíníń mūryndyq boluymen de kórme ūıymdastyryldy.
TÚRKSOI Bas hatshysy Sūltan Raev túrkí áıelderíníń ruhanı kóshbasshylyq rólíne joǵary baǵa beríp, mádenıetaralyq dıalogty damytuǵa úles qosqan bírqatar qatysushylardy Alǵys hattarmen marapattady.
Leman Ienıgún Túrkí álemíníń mádenıetínde ana tek otbasynyń ǵana emes, búkíl ūlttyń ózegí retínde qabyldanatynyn, Orhon jazbalarynan bastap Qorqyt ata kítabynda ana beınesí danalyqtyń, tózímníń, meıírímdílík pen erlíktíń sımvoly retínde ǵasyrlar boıy ortaq jadymyzda saqtalyp keletínín aıta kele, Túrkıyanyń áıelder men otbasyna qatysty áleumettík sayasattaǵy tájírıbesímen bólísuge daıyn ekenín, ortaq máselelerdí túrkí elderí bírlese sheshuí qajet ekenín atap óttí.
Qazaqstan halqy Assambleyasy Respublıkalyq Analar keńesíníń tóraǵasy Nazıpa Shanaı TÚRKSOI shańyraǵynyń astynda analarǵa arnalǵan halyqaralyq qoǵamdyq ūıym qūru turaly bastama kóteríp, onyń ruhanı mūrany saqtau men gumanıtarlyq yntymaqtastyqty keńeıtu ísíndegí mańyzdylyǵyn atap óttí. Qoldau tapqan jaǵdaıda būl qūrylym «Túrkí álemíníń analary» atty halyqaralyq qoǵamdyq ūıym retínde jūmys ísteı alatynyn jetkízdí.
Jıynda Qazaqstan Prezıdentí Qasym-Jomart Toqaevtyń Túrkí memleketterí ūıymynyń mereıtoılyq sammıtíndegí sózí eske alynyp, eldíń salt-dástúr, reformalar, bílím, ǵylym, sením, ınvestıtsıya jáne medıatsıya baǵyttaryndaǵy bastamalar talqylandy. Túrkıya Prezıdentí Rejep Taıyp Erdoǵannyń 2025 jyldy Otbasy jyly dep jarıyalauy jáne «Túrkí álemíníń keleshegí – 2040» qūjatynyń qabyldanuy ana men otbasy qūndylyqtaryn nyǵaıtu jolyndaǵy ortaq strategıyalyq ūstanymdardy aıqyndaıtyny atap ótíldí.
Lachın Ovazgeldıeva Túríkmenstandaǵy otbasy jáne ana sayasaty boıynsha memlekettík qoldau sharalaryn tanystyrdy.
YuNESKO qoldauyndaǵy ortalyq ókílí Saltanat Áshímova aqyn, memleket jáne qoǵam qaıratkerí Oljas Súleımenovtíń TÚRKSOI-ǵa joldaǵan alǵys hatyn oqyp, mūndaı sharalardyń Túrkí álemíníń ózara jaqyndasuyna zor úles qosatynyn jetkízdí.
Túrkıya Respublıkasynyń Ádílet jáne damu partıyasynyń Túrkí memleketterímen baılanystar jóníndegí tóraǵa orynbasary doktor Reshıde Yuksel Tomırıs, Domalaq ana, Aıǵanym hanym, Mánshúk pen Álıya syndy qazaqtyń ūly analaryn, sondaı-aq Anadolynyń Nene Hatun, Fatma Seher Erden jáne Halıme Chavush syndy tarıhı tūlǵalaryn atap ótíp, olardyń erlígí men ruhanı quaty túrkí áıelderíníń ortaq beınesín qalyptastyratynyn aıtty.
«Túrkí álemíníń analary: dástúr jáne qazírgí zaman» atty dóńgelek ústel túrkí halyqtary arasyndaǵy mádenı dıalogty tereńdetíp, ruhanı sabaqtastyqty analardyń beınesí arqyly dárípteudíń mańyzdy alańyna aınaldy. Shara barysynda analar keńesteríníń qoǵamdyq áleuetí, gumanıtarlyq bastamalardy qoldaudyń mańyzy jáne otbasy qūndylyqtaryn saqtau máselelerí erekshe atap ótíldí.
Jıyn sońynda Túrkí álemíníń áıelder Odaǵyn qūru turaly bastamalyq ıdeyalar da ortaǵa salyndy.