Búgín Aqorda rezıdentsıyasynda AQSh elshísí Djulı Stafft pen Bolgarıya elshísí Georgı Vodenskı Qazaqstan prezıdentíne sením gramotalaryn tapsyrdy, dep habarlaıdy Aqshamnews.kz tílshísí.
Memleket basshysy Bolgarıya elshísí arqyly Prezıdent Rumen Radevke sálemín joldap, onyń byltyr elímízge jasaǵan resmı sapary ekíjaqty qarym-qatynasqa aıtarlyqtaı tyń serpín bergenín aıtty.
"Sízdíń elíńízben yntymaqtastyqty odan árí nyǵaıtuǵa múddelímíz. Sayası, sondaı-aq ekonomıkalyq baǵyttaǵy yqpaldastyq ayasyn keńeıtu úshín qoldan kelgen múmkíndíktíń bárín jasaımyz", – dedí Toqaev.
Qasym-Jomart Toqaev Djulı Stafftpen áńgímelesu barysynda AQSh-qa jasaǵan sapary tabysty ótkenín yqylaspen eske aldy.
"Prezıdent Donald Tramp myrzamen dostyq ráuíshte mazmūndy áńgíme órbítíp, kelíssózder júrgízdík. Tayauda bíz telefon arqyly emen-jarqyn sóılesíp, ekíjaqty yntymaqtastyǵymyzǵa qatysty kóptegen máselení talqyladyq. Mení jyl sońynda Qūrama Shtattarda ótetín G20 sammıtíne qatysuǵa shaqyrǵany úshín alǵys aıtamyn. Bíz kóptegen saladaǵy strategıyalyq seríktestígímízdí damytyp, nyǵaıtuǵa kúsh salamyz", – dedí Toqaev.
Qasym-Jomart Toqaev elshílerdí dıplomatıyalyq mıssıyalarynyń resmı túrde bastaluymen qūttyqtap, olardyń memleketterí basshylaryna ízgí tílegín joldady.