Prezıdent Qasym-Jomart Toqaev Turkistan gazetíne bergen sūhbatynda Jańa jyl qarsańynda Kremlde Qazaqstannyń Tūńǵysh Prezıdentí Nūrsūltan Nazarbaevtyń Reseı prezıdentí Vladımır Putınmen kezdesuí jónínde píkír bíldírdí, - dep habarlaıdy aqshamnews.kz tílshísí.
Sūhbat barysynda jurnalıst būl kezdesuge qatysty túrlí píkírler men qauesetterdíń taraǵanyn atap óttí. Típtí 2029 jyly Qazaqstandaǵy bılík tranzıtí talqylanǵany, al Nazarbaevtyń būl úderíste sheshushí ról atqarǵysy keletíní, árıne, Putınníń jeke qoldauymen júzege asuy múmkín ekení jónínde áńgímeler aıtylyp júrgenín jetkízdí.
"Tūraqty túrde ótkízílíp júrgen kezdesuler beıresmı sıpatqa ıe. Mūny Reseı prezıdentíníń ózí de atap ótedí. Tayauda ótken Sankt-Peterburgtegí basqosuda Vladımır Putın maǵan Nūrsūltan Nazarbaevty onyń ótíníp sūrauy boıynsha qabyldaıtynyn aıtqan edí. Reseı prezıdentíníń erekshelígí: ol dostarymen jáne áríptesterímen jyly qarym-qatynas qūra bíledí. Jūmysy óte qarbalas bolsa da, senbí kúní Qazaqstannyń tūńǵysh prezıdentímen asyqpaı áńgímelesuge uaqytyn bóldí. Ol Nūrsūltan Nazarbaevty Eurazıyadaǵy yqpaldastyq úderísíníń bastauynda tūrǵan tájírıbelí sayasatker retínde baǵalaıdy. Reseı būl úderíste jetekshí ról atqaryp otyr. Kremldegí kezdesu Vladımır Putınníń adamgershílígí joǵary ekenín kórsetedí.
Ondaı áńgímeler barysynda ne aıtylǵany maǵan qyzyq emes, būl turaly eshqashan sūraq qoımaımyn.
Al Nūrsūltan Nazarbaevtyń jeke basyna keler bolsaq, men ony qazírgí qazaq memlekettígíníń negízín qalaǵan tūlǵa dep sanaıtynymdy bírneshe ret aıttym. Onyń memlekettík ınstıtuttardy jáne ekonomıkanyń naryqtyq tetíkterín qūru, jańa astanamyzdy salu jolyndaǵy eńbegín bárí bíledí. Ózíńízge málím, bíz Qazaqstandy Ádíldík, Zań jáne Tártíp ornaǵan el etkímíz keledí. Sondyqtan eshkímdí alalamaı, ár azamattyń eńbegín ádíl baǵalau kerek. Būl elímízdíń tūńǵysh prezıdentí Nūrsūltan Nazarbaevqa da qatysty", - dedí Prezıdent.
Al bılík tranzıtí turaly sūraqqa Qasym-Jomart Toqaev bylaı jauap bergen: "Būl jónínde sóz qozǵauǵa álí erte, aldymyzda tabandy jūmysqa toly bírneshe jyl bar".