Ata Zańda memlekettík tíl – qazaq tílíníń konstıtutsıyalyq mártebesí taıǵa tańba basqandaı jazyldy, dep habarlaıdy aqshamnews.kz tílshísí.
Memleket basshysy Qasym-Jomart Toqaev Halyqaralyq «Qazaq tílí» qoǵamynyń H qūryltaıynda sóz sóıledí.
«Bíraq, ashyǵyn aıtuymyz kerek, Egemendígímízdí qorǵauǵa qatysty máseleníń bárí tolyǵymen sheshímín tapty desek, ústírt píkírge teń bolar. Aldymyzda auqymdy jáne kezek kúttírmeıtín, mańyzdy árí kúrdelí míndetter tūr. Halyqaralyq ahualdy kóríp-bílíp otyrsyzdar. Álemde sayası, ekonomıkalyq, ıdeologıyalyq shıeleníster ushyǵyp tūr. Osyndaı almaǵaıyp kezeńde álemníń bolashaǵyn boljau óte qıyn ekení túsíníktí. Mūndaı zamanǵa bízdíń bír ǵana jauabymyz bar. Būl – bírlígímízdí bekemdep, ortaq múddege kúsh jūmyldyryp, ūlttyq jauapkershílígímízdí tereń sezíne otyryp, qasıettí Otanymyz – Qazaqstan Respublıkasyna adal qyzmet etu. Túptep kelgende, Egemendíktí nyǵaıtu – halyqtyń ál-auqatyn arttyru, jańa tehnologıyalardy jetík meńgeru, zańdy qūrmetteu, tártípke baǵynu, ózara janashyr, eńbekqor, jasampaz bolu, tabıǵatty ayalau degen sóz», – dedí Prezıdent.
Memleket basshysy osy míndetterdí tabysty oryndaǵanda ǵana jahan órkenıetíníń tórínen laıyqty oryn alatynymyzdy atap aıtty.
«Sondyqtan Konstıtutsıyada qazírgí zaman talabyna saı bílím men ǵylymdy, ınnovatsıyany, adam kapıtalyn damytu memlekettíń strategıyalyq míndetí retínde bekítíldí. Ūltymyzdyń bas qūjatynda, yaǵnı Konstıtutsıyamyzda elímízdíń tamyry tereń tarıhy men bítím-bolmysy, bolashaqtaǵy beınesí aıqyndaldy. Atap aıtqanda, memlekettík tíl – qazaq tílíníń konstıtutsıyalyq mártebesí taıǵa tańba basqandaı jazyldy», – dedí Prezıdent.