Tótenshe jaǵdaılar mınıstrligi qar qalyń túsýine baılanysty Qazaqstannyń taýly aımaqtarynda kóshkin qaýpi kúsheıgenin eskertip, turǵyndardy joryqqa shyqpaýǵa shaqyrdy, - dep habarlaıdy Aqshamnews.kz tilshisi.
"Elimizdiń taýly aımaqtarynda qardyń jınalýyna baılanysty jekelegen qar kóshkinderi ózdiginen túsýi múmkin. Kóshkinderdiń júrýine túrtki bolý qaýpine baılanysty qar basqan tik betkeılerge shyqpaǵan jón. Taýda abaı bolyńyzdar. Halyqtyń, týrıserdiń, qonaqtar men demalýshylardyń qaýipsizdigin qamtamasyz etý maqsatynda Almaty qalasyndaǵy, Almaty jáne Shyǵys Qazaqstan oblystaryndaǵy taýlarda qar kóshkinderin májbúrlep túsirý boıynsha aldyn alý jumystary júrgizildi, nátıjesinde 3516 m³ qar massasy túsirildi", – dep habarlady juma kúni TJM baspasóz qyzmeti.
TJM "Qazseldenqorǵaý" MM mamandary kóshkin qaýpi bar aýmaqtarǵa turaqty ári úzdiksiz monıtorıń júrgizip jatqanyn atap ótti.
"Búgingi kúnge deıin respýblıka boıynsha 163 jerústi tekserý júrgizildi. Qar kóshkinderiniń júrýi múmkin aımaqtarda 108 eskertý belgisi ornatyldy. Sonymen qatar «Abaılańyz, qar kóshkini!» degen 944 eskertý habarlamasy, 3754 aqparattyq broshúra, sondaı-aq «Abaılańyz, qar kóshkini!» jáne «Abaılańyz, seń júrýi!» atty úgit-nasıhattaý aqparattyq materıaldar taratyldy", - dep qosty vedomstvo.
TJM málimetinshe, qar kóshkini jaǵdaıy shıelenisken kezde jáne «Qazgıdromet» RMK daýyldy eskertýleri negizinde tótenshe jaǵdaılar departamentterimen jáne ishki ister organdarymen birlesip kóshkin qaýpi bar aımaqqa halyq pen avtokóliktiń kirýin shekteý úshin baqylaý-ótkizý beketter qoıylady.
"Eger qar kóshkini týraly eskertý jarıalansa, taýlarǵa barýdan bas tartqan jón. Eger eskertý bolmasa, jolǵa shyqpas buryn meteorologıalyq boljamdardy bilý, qozǵalys marshrýttaryn jasaý, daıyndyqsyz ýchaskelerde serýendeýden jáne syrǵanaýdan aýlaq bolý, tańbalanǵan soqpaqtarmen júrý, sondaı-aq qar kóshkini qaýpi bar jerler týraly múmkindiginshe kóbirek bilý, qaýipti betkeılerden múmkindiginshe aýlaq bolý kerek. Eger taýǵa shyǵar aldynda qalyń qar tússe, joryqty eki-úsh kúnge keıinge qaldyrǵan durys, al qar kóshkini bolmaǵan jaǵdaıda onyń shógýin kútken durys", - delingen habarlamada.