Qazaqstannyń Mádenıet jáne aqparat mınıstrligi zańǵa ózgeris engizip, telegram-arnalardy tirkeýden ótýge mindettemek.
Al, resmı tirkeýden ótken telegram-arnalar anonımdi túrde jumys isteı almaıdy. Bul týraly mınıstr Aıda Balaeva málim etti, dep habarlaıdy aqshamnews.kz.
«Qazir anonımdi telegram-arnalar ótiriktiń, manıpýlásıa men provokasıanyń ordasyna aınaldy, halyqtyń kóńil-kúıine áser etip, jalǵan aqparat taratady. Buǵan endi kóz juma qarap otyrý múmkin bolmaı ketti, sondyqtan, mınıstrlik olardy anyqtap, buǵattaý úshin jumys istep jatyr. Bizdiń pozısıamyz naqty – ádeıi jalǵan aqparat taratyp, aqparat aıdynyn turaqsyz etkenderge jaýapkershilikti kúsheıtemiz. Meniń oıymsha, anonımdi jumys isteý tásili – provokatorlar úshin tıimdi bolmaýy kerek jáne ereje bárine ortaq. Bul baǵytta jaqsy nátıje bar, máselen, Qir sabyn arnasy. Meniń oıymsha, Telegram ákimshiligimen kelissóz bastaıtyn ýaqyt jetti», - deıdi Balaeva úkimettegi brıfıńte.
Keıin kýlýarda Azattyk Ryhy tilshisiniń suraǵyna jaýap bergen Balaeva olardy anyqtap, buǵattaý úshin naqty qandaı shara qoldanbaq ekenin túsindirdi.
«Biz zań boıynsha búkil Telegram-arnalardy tirkeýden ótýge mindettep, sol kanalda shyǵatyn kontent úshin bir adamdy jaýapty etemiz. Olar zań aıasynda jumys isteý kerek. Anonımdi arnalardyń jumysy bizdiń resmı BAQ-tarǵa áser etip otyr», - dedi Balaeva.