VAKTsINA QANShA TŪRADY?
Ekpe aludan qashpańyz, ol – índettí jeńudíń jalǵyz joly!
QR Densaulyq saqtau mınıstrí Alekseı Tsoıdyń málímdeuínshe, ótken aılarmen salystyrǵanda, índet jūqtyrǵandardyń sany ekí ese qysqarǵan. Almaty boıynsha kórsetkísh te dál osyndaı. Respublıka deńgeıínde ólím-jítím kórsetkíshí 2 aptanyń íshínde 1,6 ese tómendegen. Óńírlerdegí epıdemıologıyalyq ahualdyń jaqsaruyna baılanysty auruhanalarda em alyp jatqan nauqastardyń sany azaıǵan. Būl kórsetkíshterge koronavırusqa qarsy salynǵan ekpeníń de edáuír áserí baryn aıtyp otyr mamandar.
Qazaqstan halqyn vaktsınalau úshín memleket byudjetínen 50 mlrd teńge bólíníp otyr
Elímízde kún saıyn shamamen 80–100 myń adamǵa ekpe egíledí. Óńírlerde vaktsına tapshylyǵy joq. Degenmen halyq arasynda koronavırusqa qarsy ekpege álí de qyryn qaraıtyndar az emes. Al byltyrdan berí jer-jahandy bír tarynyń qauyzyna syıǵyzyp, ábígerge salyp tūrǵan COVID-19 adam ne el, ne jer tańdap jatpaıdy, jolyndaǵy kezíkkendí jaıpap ótedí. Sondyqtan oǵan tosqauyl qoyu úshín vaktsına alu kerek. Ol úshín memleket qalaǵan ekpeńízdí su tegín ūsynyp otyr. Jalpy, Qazaqstan halqyn vaktsınalau úshín memleket byudjetínen 50 mlrd. teńge bólíngen.
Eń alǵash elímízge bıylǵy 31 qańtarda reseılík «Sputnık V» vaktsınasynyń 22 myń dozasy jetkízílgen bolatyn. Onyń bír dozasynyń qūny 11 myń teńgeden aınalǵan. Reseı keıín preparat kólemíníń kóptep óndíríluíne baılanysty jáne ónerkásíptík óndírístíń tehnologıyasyn ońtaılandyru ese bínen onyń qūnyn túsírdí. Búgínde atalǵan ekpeníń ekí dozasy qosymsha aqysyz 5 myńǵa tómendedí.
Tól vaktsınamyzdy jasap shyǵaru úshín el qazynasynan 2,5 mlrd. teńge jūmsaldy
Al bıylǵy mamyrda ózímízdíń otandyq ǵalymdar «QazCovid-in» vaktsınasyn jasap shyǵardy. Preparattyń bír dozasy 4,7 dollar (qosymsha aqysyz 2132 teńge) kólemínde boldy. Tól vaktsınamyzdy jasap shyǵaru úshín el qazynasynan 2,5 mlrd. teńge jūmsaldy.
Almaty tūrǵyndaryn tegín vaktsınalau úshín búgínde jergílíktí bılík ókílderíníń ūsynysyn qoldaı ketken kásípkerler qyruar qarajat tūratyn sauda oryndaryn da halyq ıgílígí úshín tegín bersín, auruhana, emhana ǵımarattarynan bólek, írí sauda-oıyn-sauyq ortalyqtarynan, sauda úılerí men bazarlardan, típtí, mádenıet oshaqtarynan da arnaıy oryndar bólíp, ekpe egu punktterín ashty. Maqsat – halyqqa tegín vaktsınany alu úshín qolaıly jaǵdaı jasau. Sonymen, shaharda bas-ayaǵy 211 ekpe egu punktí jūmys ístep tūr. Oǵan qosa, qūramynda kásíbı mamandar bar kóshpelí mobıldí brıgadalar el aralap júr. Olar tūrǵyndarǵa qolaıly oryndarǵa baryp ekpe salyp beredí.
Ókíníshke oraı, bíz memleket jasap beríp otyrǵan osynau múmkíndíkterdí paıdalanbaı otyrǵanymyz jasyryn emes. Álí de áleumettík jelílerde jeldeı esíp júrgen resmı emes jalǵan aqparattarǵa kóbírek seníp otyrmyz. Bos sózderdí termelep júrgende kózge kórínbeıtín vırus byltyrǵydaı taǵy da bas kótertpeı júrmese ıgí. Al qazírgí tańda koronavırusqa qarsy ekpege qol jetkíze almaı qynadaı qyrylyp jatqan nemese ózderí óndíruge qauqarsyz memleketter de bar.
Vaktsınadan emes, vırustan qorqu kerek
Ótken aptada taraǵan derek kózderíne súıensek, bıyldyqqa álem boıynsha koronavırustan 1 mıllıon 880 myńnan astam adam kóz jūmǵan. Jarty jyldaǵy adam ólímí byltyrǵy kórsetkíshten asyp túsken. Qazír vaktsınalau qarqyndy júríp jatqan batys elderínde epıdemıologıyalyq ahual tūraqtala bastaǵanymen, Afrıka, Latyn Amerıkasy men Azıyanyń keıbír memleketterínde qauíp qaıta kúsheıgen. Úndístanda «Alfa» jáne «Delta» shtamdary tarap kettí. Būl brıtandyq jáne úndí dep aıtylyp kelgen shtamdardyń resmı atauy. Ásírese, alǵash ret Úndístanda anyqtalǵan vırustyń «Delta» túrí mamandardy qatty alańdatyp otyr.
Tez taralatyn būl shtamm jastarǵa da auyr tıedí. Sońǵy aptalarda Ońtústík Afrıka Respublıkasy, Uganda, Namıbıya, Brazılıya, Peru elderínde aurudy jūqtyru deregí jıílep ketken. Būl ekpe alu boıynsha baı men kedeı elderdíń arasyndaǵy alshaqtyqty kórsetedí. Máselen, Afrıkada halyqtyń tek 2%-y, al Azıyada 6%-dan astamy ekpeníń bírínshí dozasyn saldyrǵan. Dúnıejúzílík densaulyq saqtau ūıymynyń mamandary koronavırustyń «Delta» shtamy Europada taralyp, halyqty qyspaqqa aluy múmkín dep eskertuden jalyǵar emes.
Búgínde elímízde koronavırusqa qarsy vaktsınanyń 4 túrí qoljetímdí: otandyq «QazVac», sosyn «Sputnık V», «Hayat Vax SARS-CoV-2 Vero Cell» jáne «KoronaVak».
17 mausymdaǵy derekke súıener bolsaq, Almaty qalasy boıynsha bír táulík íshínde 5 802 adam vaktsına aldy. 1 aqpan – 16 mausym aralyǵynda qala boıynsha barlyǵy 357 299 adam vaktsına alǵan. Vaktsına alǵandardyń jalpy sanynan 60 jastan asqan qart kísíler 41 117 adamdy qūraıdy. Qala boıynsha vaktsınanyń qaldyǵy – bírínshí komponenttíń 80 251 dozasy jáne ekínshí komponenttíń 101 691 dozasy bar. Vaktsınadan emes, vırustan qorqu kerek. Ekpe aludan qashpańyz. Ol - índettí jeńudíń bírden-bír jalǵyz joly.