Almaty qalasy №11 qalalyq emhanasynyń profılaktıka jáne áleýmettik-psıhologıalyq kómek bóliminiń meńgerýshisi Alóna Zekýnova skrınıngten ýaqtyly ótýdiń mańyzdylyǵy týraly aıtyp berdi.
Skrınıng – bul jaı ǵana medısınalyq tekseris emes. Bul – aýrý belgileri áli baıqalmaı turyp, qaýipti dertterdi erte kezeńinde anyqtaýǵa múmkindik beretin shara.
Bul tekserý 40 pen 70 jas aralyǵyndaǵy adamdarǵa jup jyldary (40, 42, 44, 46, 48, 50, 52, 54, 56, 58, 60, 62, 64, 66, 68, 70) ótkiziledi. Baǵdarlama aıasynda dárigerler arterıalyq gıpertonıa, ıshemıalyq júrek aýrýy, qant dıabeti, glaýkoma jáne onkologıalyq aýrýlardyń bar-joǵyn tekseredi. Sonymen qatar, qaýip faktorlary: dene salmaǵy, ómir salty, fızıkalyq belsendilik deńgeıi, arterıalyq qysym jáne tamaqtaný jaǵdaıy baǵalanady.
40–70 jas aralyǵyndaǵy erler men áıelder, oftalmologtyń esebinde turmaǵan jaǵdaıda, glaýkomaǵa arnaıy tekserýden ótedi. Áıelder jatyr moıny obyryna qarsy skrınıngten 30, 34, 38, 42, 46, 50, 54, 58, 62, 66 jáne 70 jasynda ótedi, sondaı-aq sút bezi obyryna qarsy tekserý 40 pen 70 jas aralyǵynda, onkologtyń baqylaýynda bolmasa da júrgiziledi. Al 50 men 70 jas aralyǵyndaǵy erler men áıelderge, ishek aýrýlary joq jáne esepte turmaǵan jaǵdaıda, jup jyldary kolorektaldy qaterli isikke tekserý júrgiziledi.
Sonymen qatar, V jáne S vırýstyq gepatıtterine qarsy skrınıng qaýip tobyna kiretin adamdar arasynda ótkiziledi. Olardyń qataryna: hırýrgıa, gınekologıa, stomatologıa, qan qyzmeti men zerthana qyzmetkerleri sıaqty medısınalyq mamandar; josparly nemese shuǵyl operasıaǵa daıyndalyp jatqan naýqastar; gemodıalız, gematologıa, onkologıa jáne transplantologıa bólimshelerinde em qabyldap jatqan adamdar; qan quıǵyzatyn nemese aǵza, tin jáne jasýsha transplantasıasyn ótkergen pasıentter jatady. Sonymen qatar, árbir júkti áıel mindetti túrde tekserýden ótedi, sondaı-aq juqtyrý qaýpi joǵary osal top ókilderi de qamtylady.
Skrınıngten ýaqtyly ótý – densaýlyqty saqtap qalýdyń sheshýshi faktory bolýy múmkin.
Ózińizdi kútińiz jáne mańyzdy tekserýdi keıinge qaldyrmańyz.
Esińizde bolsyn, erte anyqtalǵan aýrýdy emdeý jeńil bolady jáne kóbinese sátti aıaqtalady.