Jelíde qyzmetkerí qazaq tílínde sóıleuden bas tartqan Shymbūlaqtaǵy tau-shańǵy kurortyndaǵy Gusto meıramhanasyna qatysty dau tuyp, oqıǵanyń vıdeosy áleumettík jelíde jarıyalandy, - dep habarlaıdy aqshamnews.kz tílshísí.
Jelíde taraǵan kadrlarda mekeme qyzmetkerí qazaqsha qyzmet kórsetudí ótíngen azamatqa dórekí jauap bergení baıqalady. Avtordyń sózínshe, ol tek meıramhanada qazaq tílínde qyzmet kórsetetín adam bar-joǵyn sūraǵan, alaıda Elena esímdí qyzmetker janjal shyǵaryp, er adamdy mekemeden kúshtep shyǵaruǵa tyrysqan. Jazba avtory oqıǵaǵa qatysty beıne jáne kuágerler baryn aıtyp, mūndaı jaǵdaıdyń turıstík aımaqta eldíń ımıdjíne áser etetínín jetkízdí.
Kóp ūzamaı qyzmetker de óz píkírín bíldíríp, er adam kúsh qoldanǵanyn jáne ózín qorqytqanyn málímdedí. Ol qazaq tílín azdap túsínetínín, típtí jaqyn dosy qazaq ūltynan ekenín de atap óttí.
Oqıǵa meıramhananyń bedelíne áser etíp, 2GIS paraqshasynda qazaq tílínde qyzmet kórsetílmeıtíní turaly shaǵymdar men qyzmetkerdí jūmystan shyǵarudy talap etken myńdaǵan píkír qaldyrylǵany jazyldy.
Al meıramhana ákímshílígí būl jaǵdaıǵa baılanysty resmı málímdeme jasap, 21 jeltoqsanda íshkí tekserís ayaqtalǵanyn málímdedí.
"Tekseru nátıjesí boıynsha servıs standarttary men korporatıv kommunıkatsıya talaptaryna sáıkes meıramhana ákímshísíníń qyzmetín toqtatu turaly basqarushylyq sheshím qabyldandy. Būl sheshím - tek íshkí shara jáne oqıǵaǵa qatysqan tūlǵalardyń áreketteríne qūqyqtyq baǵa berudí kózdemeıdí. Oqıǵaǵa baılanysty odan árí qarau zańnamada belgílengen tártíppen taraptardyń ózara qatysuymen júzege asyrylyp jatyr. Gusto meıramhanasy qonaqtarmen árdaıym syılastyq pen ádeptí qarym-qatynas qaǵıdattaryn ūstanady. Qandaı jaǵdaı bolmasyn, dórekí nemese orynsyz sóıleu tásílíne jol berílmeıdí jáne būl bízdíń servıs standarttarymyzǵa qaıshy keledí. Osyǵan baılanysty bíz íshkí reglamentterdí kúsheıtíp, qyzmetkerlermen qosymsha jūmys júrgízudí qolǵa aldyq. Bolǵan jaǵdaıdyń qoǵamda terís píkír tudyrǵanyna ókínísh bíldíremíz jáne kórsetken túsínístík pen kerí baılanys úshín qonaqtarymyzǵa alǵys aıtamyz", - delíngen jazbada.
Sonymen qatar, Gusto memlekettík tíldí qūrmetteıtínín jáne qonaqtarǵa qazaq, orys, aǵylshyn tílderínde qyzmet kórsetetínín málímdedí.