Almatyda kıksherıng qyzmetín damytu jáne retteu máseleleríne arnalǵan dóńgelek ústel óttí. Jıynǵa qalalyq máslıhat deputattary, «Respublıka» partıyasynyń ókílderí, sondaı-aq samokattardy jalǵa beru qyzmetín ūsynatyn kompanıyalardyń basshylary qatysty.
Kezdesude qala kósheleríndegí ekí dóńgelektí kólíkterdí paıdalanu tártíbí, qauípsízdík sharalary jáne ınfraqūrylym máselelerí jan-jaqty talqylandy.
«Respublıka» partıyasy Almaty qalalyq fılıalynyń tóraıymy Sholpan Asqarqyzy samokattardy shekteu máselesíne qatysty píkír bíldíríp, mūndaı qadamnyń qalalyq mobıldíkke terís áser etuí múmkín ekenín atap óttí. Onyń aıtuynsha, Almaty – kólík júktemesí joǵary megapolıs. Eger samokattardy shektese, qoǵamdyq kólík pen avtojoldarǵa túsetín salmaq odan árí artyp, ekologıyalyq jaǵdaı da nasharlauy yqtımal. Osy rette partıya ókílderí samokattardy qala ómírínen yǵystyrudy emes, olardy qauípsíz árí rettelgen jaǵdaıda qoldanuǵa múmkíndík berudí ūsyndy.
Almaty qalasy Máslıhatynyń deputaty Saltanat Bahtıyarqyzy da būl máseleníń qalalyq kún tártíbínde ózektí oryn alyp otyrǵanyn atap óttí. Onyń aıtuynsha, qala tūrǵyndarynan samokattardyń beıbereket qoıyluy, trotuarlarda bóget jasauy jáne keıbír jaǵdaılarda jol-kólík oqıǵalaryna sebep boluy turaly shaǵymdar jıí túsedí.
«Búgíngí dóńgelek ústel barysynda kıksherıng kompanıyalary tarapynan bírqatar mańyzdy jūmystar júrgízílíp jatqanyn baıqadyq. Qala boıynsha 50 skauttan tūratyn arnaıy top qūrylyp, samokattardy jınau, retteu jáne qauípsízdígín qamtamasyz etu baǵytynda júıelí jūmys ístep jatyr. Alaıda būl bastamalardyń tolyq íske asuy úshín qalada jetkílíktí ınfraqūrylym – arnaıy tūraq oryndary men baqylau alańdary qajet», – deıdí deputat.
Ol samokattardy tolyqtaı joldyń kólík júretín bólígíne kóshíru jóníndegí ūsynysqa da píkír bíldírdí:
«Qazírgí jaǵdaıda mūndaı ózgerís qauíptí boluy múmkín. Statıstıkalyq derekter boıynsha samokattardyń qatysuymen bolatyn jol-kólík oqıǵalary basqa kólík túrlerímen salystyrǵanda áldeqaıda az. Almatyda kúníne 100 myńǵa juyq samokat sapary tírkeledí, būl – aıtarlyqtaı úlken aǵyn. Sondyqtan būl baǵytta asyǵys sheshím qabyldamaı, jan-jaqty saralanǵan regulyatsıya qajet», – dep naqtylady ol.
Deputat JSN arqyly tírkeu, nómírlík belgíler engízu jáne «Sergek» júıesímen ıntegratsıya sıyaqty ūsynystardy qoldap, kıksherıng kompanıyalary men «Respublıka» partıyasy arasynda jasalǵan memorandum qaladaǵy mıkromobıldíktí retteuge oń áser etetíníne sením bíldírdí.
Kezdesude kıksherıng ınfraqūrylymyn retteudíń naqty tetíkterí qarastyryldy. Qala ákímdígínen samokattarǵa arnap 5 myń tūraq ornyn belgíleu jūmystary bastalǵany aıtyldy. Sala mamandarynyń aıtularynsha, būl trotuarlarǵa beıbereket tastalǵan samokattar sanyn azaıtuǵa múmkíndík beredí. Sonymen bírge 18 jasqa deıíngí azamattarǵa samokat jaldauǵa tyıym salu, ár kólíkke nómírlík belgí beru, paıdalanushylardy JSN arqyly tírkeu, sondaı-aq jasandy ıntellekt pen kameralar arqyly baqylaudy kúsheıtu ūsynyldy.
Jıyn barysynda kıksherıng salasyndaǵy írí operatorlardyń bírí – JET kompanıyasynyń negízín qalaushy Meırambek Ábílqasymov problemalardy naqty derektermen túsíndírdí. Onyń aıtuynsha, oqys oqıǵalardyń basym bólígí — kámeletke tolmaǵandardyń júruí, bír samokatqa ekí adamnyń mínuí jáne jol ótkelderínen túspeı ótu sıyaqty úsh negízgí sebepten tuyndaıdy. Sondyqtan JSN arqyly tírkeu men nómírlík belgíler tártíptí jaqsartuǵa jáne būzushylyqtardy anyqtaudy jeńíldetuge múmkíndík beredí. Kompanıya deregíne sáıkes, Almatyda kúníne 100 myńǵa juyq samokat sapary jasalady. Būl kórsetkísh samokattardyń qala mobıldígíníń ajyramas bólígíne aınalǵanyn kórsetedí.
Jıyn sońynda qatysushylar bírlesken memorandumǵa qol qoıyp, ūsynystardy júıeleuge kelístí. Odan keıín qorytyndy ūsynystar Májílíske joldanady. Sarapshylardyń píkírínshe, búgíngí tańda samokattar – qalanyń qalypty kórínísí men ınfraqūrylymynyń bír bólígí. Sondyqtan eń tıímdí jol – tyıym salu emes, rettelgen, qauípsíz jáne mádenıettí qoldanu júıesín qalyptastyru deıdí mamandar.
