«El Dauysy» qoǵamdyq qory 2026 jylǵy 15 nauryzda Qazaqstanda ótken respublıkalyq referendumdy táuelsíz qoǵamdyq baqylaudyń qorytyndylaryna arnalǵan ashyq baspasóz konferentsıyasyn ótkízdí, – dep habarlaıdy aqshamnews.kz tílshísí.
Kezdesu ayasynda qor basshylyǵy dauys beru kúní baıqaushylar jelísíníń jūmysy turaly aıtyp, baqylaudyń aldyn ala nátıjelerín ūsyndy, sondaı-aq saılau uchaskeleríndegí dauys beru protsesín ūıymdastyruǵa qatysty negízgí qorytyndylarmen bólístí.
“El Dauysy” qory 2020 jyldan berí jūmys ístep keledí. Osy kezeńde bíz 6 myńnan astam baıqaushyny oqytyp, dayarladyq. Búgínge deıín ótken barlyq elektoraldyq protsesterge, sonyń íshínde parlamenttík jáne prezıdenttík saılaularǵa qatystyq. Referendumdy baqylau tájírıbemíz de bar. Bıyl referendum ótetíní jarıyalanǵan sátten bastap bíz bírden ún qatyp, akkredıtteu merzímí jyl sońynda ayaqtalǵandyqtan, ony jańartyp, táuelsíz baqylaudy ūıymdastyruǵa kírístík. Sonymen qatar, bıyl 2020 jyldan berí bízben tūraqty jūmys ístep kele jatqan baıqaushylar pulynyń qalyptasuynyń arqasynda baqylau geografıyasyn keńeıte aldyq. Olardyń tájírıbesíníń arqasynda bízge jańa qatysushylar qosyldy. Būdan bólek, jańa baıqaushylar áleumettík jelíler arqyly maǵan tíkeleı habarlasty», – dedí qor jetekshísí Aıda Jeksen.
Onyń aıtuynsha, bıyl qordyń qoǵamdyq baqylau jobasy Qazaqstannyń 32 qalasyn qamtydy. Olardyń qatarynda írí óńírlík ortalyqtarmen qatar shaǵyn qalalar da bar. Qor baıqaushylary Astana, Almaty, Shymkent, Qaraǵandy, Pavlodar, Óskemen, Qostanaı, Aqtau, Atyrau, Taraz, Túrkístan, Petropavl, Qyzylorda qalalarynda, sondaı-aq Ekíbastūz, Jezqazǵan, Sátbaev, Kentau, Talǵar, Qonaev, Stepnogorsk, Rıdder jáne ózge de bírqatar eldí mekenderde jūmys ístedí.
Aıda Jeksen dauys beru kúní boıy qor baıqaushylary uchaskelerdíń ashyluyn, dauys beru protsesíníń ūıymdastyryluyn, uchaskelerdegí rásímderdíń saqtaluyn, komıssıyalardyń jūmysyn, sondaı-aq dauystardy sanau men qorytyndy qūjattardy rásímdeu protsesín tírkep otyrǵanyn atap óttí.
Uchaskelerden túsken aqparat óńírlík úılestírushíler arqyly jetkízílíp, qordyń ortalyq shtabynda jınaqtaldy.
Aldyn ala baqylau nátıjelerí boıynsha, uchaskelerdíń basym bólígínde dauys beru ūıymdasqan árí tynysh jaǵdaıda óttí.
Baqylau barysynda rásímdík sıpattaǵy jekelegen eskertuler men sıgnaldar tírkeldí, alaıda olardyń nátıjege eleulí áserí joq.
Qor jetekshísí Aıda Djeksenova azamattardyń qoǵamdyq baqylauǵa belsendí qatysu deńgeıí joǵary bolǵanyn atap óttí:
«Qazaqstanda azamattyq baqylauǵa degen qyzyǵushylyqtyń artyp kele jatqanyn kóríp otyrmyz, mūny kelushíler belsendílígínen de baıqauǵa bolady. Dauys beru kúní bízdíń baıqaushylar elímízdíń ártúrlí qalalarynda jūmys ístep, uchaskelerdegí jaǵdaıdy tírkep, aqparatty qor shtabyna jíberíp otyrdy. Bíz úshín adamdardyń qoǵamdyq protsesterge qatysuǵa jáne rásímderdíń ashyqtyǵy úshín jauapkershílík aluǵa daıyn boluy mańyzdy», – dedí ol.
Qor jetekshísí qoǵamdyq baqylaudyń negízgí mıssıyasy rásímderdíń ashyqtyǵyn qamtamasyz etu jáne zańnamanyń saqtaluyn qadaǵalau ekenín atap óttí.