Almaty qalasyndaǵy QR ÍÍM Ūlttyq ūlany 5571 áskerı bólímíníń merzímdí áskerı qyzmetshísí Azız Temírbek jauyngerlík míndetín abyroımen oryndap, ūlttyq ónerdí nasıhattap júrgen jas talanttardyń bírí.
💫18 jastaǵy Azız Qyzylorda oblysy Syrdarıya audanynda dúnıege kelgen. Bala kezínen dombyraǵa áues bolyp ósken ol mektep qabyrǵasynda alǵashqy ūstazy Gúlnaz Seralıevadan kúı óneríníń álíppesín úırenedí. Keıín Qyzylorda qalasyndaǵy Qazanǵap atyndaǵy muzykalyq joǵary kolledjínde bílím alyp, ūstazy Jansūltan Jūmabekten kúıshílík sheberlígín shyńdaıdy.
🎶Búgínde ūlandyq júzge juyq kúıdí jatqa bíledí. Onyń oryndauynda qazaqtyń áıgílí kúılerí - «Saryarqa», «Serper», «Aqsaq kıík», «Tóremūrat», «Baıjūma» syndy tuyndylar erekshe áser qaldyrady. Ázızdíń aıtuynsha, tanymal kúılerdíń basym bólígín ol nota arqyly meńgergen.
- Dombyra men úshín halqymyzdyń mádenıetín, salt-dástúrín aıqyndaıtyn qasıettí mūra. Ásker qatarynda júrsem de, «Syr elí, jyr elí» dep erekshelenetín Syr kúı mektebí ókílderíníń ízín jalǵap júrgeníme quanyshtymyn, - deıdí qatardaǵy jauynger.
🔎Qazírgí uaqytta Azız áskerı bólímníń qūramynda Almaty qalasynyń qoǵamdyq tártíbín qamtamasyz etíp, azamattardyń qauípsízdígín kúzetude. Al bos uaqytynda qarulastarynyń ótíníshímen dombyrasyn qolyna alyp, ózí bíletín kúılerdí tamyljyta oryndap beredí. Onyń áserlí oryndauyndaǵy kúıler sarbazdardyń kóńíl-kúıín kóteríp, jauyngerlík ruhyn arttyra túsedí.
Ūlttyq ūlan qatarynda áskerı qyzmetín ótep júrgen jastardyń arasynda osyndaı ónerlí azamattardyń boluy ūlttyq mádenıettíń sabaqtastyǵyn kórsetedí. Dombyranyń qońyr úní arqyly Azız Temírbek qasıettí óner tínín úzbeı, qazaqtyń ǵasyrlardan jetken kúı dástúrín jańa buynǵa jetkízudíń jarqyn úlgísín tanytyp keledí.